Sdang ka jylla iaka ‘Cash Award Scheme’ ban ai mynsiem ïaki nongialehkai, pynkup burom 231 ngut kiba jop haki kam ïalehkai

Syllad | The Rising MeghalayaJuly 28, 2022

Ka sorkar jylla haka sngi Balang lyngba ka tnat jong ka Directorate of Sports & Youth Affairs ka la wan shakhmat ban pynkup burom ia ki khun samla kynthei bad shynrang, kiba la lah ban paw ban tyngshaiñ bad khur ruh ia ki takma na ki rynsan ne lympung ialehkai kiba la long ha ka samoi ialehkai u snem 2017-18. Ha kane ka sngi la sdang ruh iaka cash award scheme haka jingialang kaba long ha Soso Tham Auditorium, Shillong.

Ka jingpynkup burom mynta ka kynti ka long ia 231 ngut ki nongialehkai kiba kynthup naduh ka Olympic bad ka Non Olympic Discipline. La sam iaka cheque kaba la kot T. 81,04,250.00 sha ki 73 ngut kiba dei Olympic sports disciplines bad 158 ngut naka Non-Olympic sports disciplines kaba kot T. 66,96,250.00.

Ha ka liang ka Olympic Discipline, ki nongialehkai ba la pynkup burom mynta ka kynti ka kynhup naduh ki nonialehkai ia ka Sports Climbing, Athletics, Archery, Football, Shooting, Boxing, Taekwando bad ka Badminton

Katba ki non olympic discipline ki nongialehkai ba la pynkup burom kidei kiba la paw bad khur ia ki takma kum ha ka Arm Wrestling, Kickboxing, Jeet Kune Do, Karate (Zendokai), Mixed Martial Arts, Body Building, Muay Thai bad Karate –Do.

Katba ka Cash Award Scheme ne ka khunsam pisa ka dei na bynta ban ithuh iaki nongialehkai kiba jop ha ki lympung ialehkai hapoh ka ri bad shabar ka ri bad ban kyrshan iaki nongialehkai na ka bynta ba kin pynkreh janai haka jingleit ialehkai ha ki rynasan kiba heh. Kane ka khunsam kan pynshlur iaki nongialehkai ban trei shitom ban ioh iaka jingjop ha ki rynsan ne ki lympung ba heh kum ka Asian Games, Commonwealth Games, World Championships, Olympics nalor kiwei kiwei. Kane ka khusnam kan ai mynsiem ban pynkhreh ialade ban mihkhmat iaka national team.

Namar ba shisien ba u nongialehkai ula ioh bsuh khlieh haka National team, bun ka khunsam pisa kan wan nalor ka khusnam na ka sorkar jylla kin ioh lyngba- Northeastern Council (NEC) Chairman’s Award for Excellence bad ka khunsam – Olympic Games – 100 lakhs na ka bynta Gold medal, 50 lakhs na ka bynta Silver medal bad 30 lakhs na ka bynta Bronze medal.  Ka Khusnam pisa haka National Games 30 lakhs na ka bynta Gold medal, 10 lakhs na ka bynta Silver medal bad 5 lakhs na ka bynta Bronze medal.

Ki nongialehkai ka jylla State kilah ruh ban ioh iaka khunsam pisa (Cash Awards) na ka Ministry of Youth Affairs and Sports, Govt. of India haka jingjop haka National Games, Asian Games, Commonwealth Games, World championships bad ka Olympic Games. Wat ki Coach jong ki nongialehkai ba ioh takma kin ioh iaka khunsam pisa na ka ministry.

Kongsan ba la wan ban iadon lang ha kane ka sngi dei u Myntri Rangbah ka jylla u Conrad K Sangma, bad u symbud kongsan dei u bah banteidor Lyngdoh, Myntri ba dei khmih ia ka tnat Sports & Youth Affairs, nangta  u Dr Vijay Kumar D IAS, uba la ai ruh ia ka jingkren maitphang, Shivansh Avasthi, Under Secretary of Sports & Youth Affairs, ki ophisar ka tnad sports, ki nongialam ka Meghalaya State Olympic Association (MSOA).

Haba kren ha kane ka jingialang naduh u Conrad K Sangma bad u bah Banteidor, ki la pynpaw ba naduh ba ka sorkar MDA ka la ioh ba kan synshar ia ka jylla, haba ki phai shisha sha ka kam ialehkai, ki sngew donkam ban phai ki khmat ki jong ki, katno tam lei lei haba shem bad iohi ba ha ki por ba mynshwa, wat lada ka la don kum kane ka jingialang ban pynkup burom, pynban ka song pisa kaba la ai sha u/ka nongialehkai ba la khur ia la ka jingjop ne ia ki takma,  ka long da shisha kaba sngew lehrain ban tip.

Kumta haba iohi ia kane, ka sorkar MDA ka la shim ia ka sien jam bad kawei na kita ka long ban lah ha kaban sdang pyntreikam ia ka sports policy bad bynrap lang ruh bad ka youth policy.

Shuh shuh u Conrad bad u bah Bantedor, ki pynpaw ba wat lada na ka liang ka jong ki ki la kham pynheh ia ka song khusnam pisa, hynrei ki tip ba ka jingai hi lehse kam pat dap ne biang, hynrei wat la katta ruh kum ki nongialam, ki sngew pat ban ong ba kaei kaba ki ai ka klong pat kum ka dak ban pyrto ban ai mynsiem ia u/ka nongialehkai ban nang trei shitom ban lah ban kynjoh ia ki mawmer kiba kham shalor ha ka jingim ialehkai ba man la ka sngi.

Shuh shuh ki la ong ruh ba ka sorkar ka la pha ruh ki khmat wat ha kaban tei ne ban shna ia kiba bun ki madan ialehkai, kiu jaka ia kilan ha man la ki dong ki thain ba don ha ka jylla kampher lada dei kiba rit haduh kiba heh, ha kaba la don ruh kum kine ki kam, kiba ka jingpyntrei ka dang iaid sted shakhmat.

Ia kane ka jingialang la wan ban sakhilang ruh da ki nongialam ba hakhmat ka Meghalaya State Olympic Association ba kynthup ia bah John F. Kharshiing Working President, Finley L Pariat General Secretary, Rajesh Kamal Jt Secretary, ki nongialam  jong ki synjuk ialehkai lem bad ki kmie ki kpa jong ki khynnah ialehkai.