Sdang ka ka tem ksing Shad Suk Mynsiem ka Seng Khasi Kmie

Syllad | The Rising MeghalayaMarch 25, 2021

Ka Seng Khasi, Kmie haka sngi Balang ka la sdang ha kaban tem ia ka ksing ka dhah kaba long kum ka dak ka jingpynkhreh ka jong ka ban pynlong ia ka Shad Suk Mynsiem, kaba mynta ka kynti, kane ka shad ainguh aidem ia u Blei Trai Kynrad kan long ha ka 10, 11 bad ka 12 tarik u Iaiong 2021.

Ka jingsdang ban tem ia ka ksing bad put ia ka tangmuri ryngkat ka kynshaw ka long da kaba pyndep ka ia nguh ka dem Kiew Ksing ba la pyndep da u Rgh Diben Syiemlieh ryngkat ka jingiadon lang ka jong u Rgh Donbokstar Kurkalang bad kawei kiwei ki dkhot ka komiti Ka  Kynhun U Tymmen, ka Seng Khasi Kmie.

Shwa ban sdang ia ka jingtem ia ka ksing ka shah, la ioh ia ka jingkren maitphang na u Rgh Don Kupar Dkhar, President Seng Khasi Kmie bad bynrap da ka jingkren na u Secretary Cultural Committee u Rgh Rangphyer Rynjah.

Hadien kane, u Rgh D. Syiem, u la leit pat sha ka nguh ka dem  BLei ban pynsngew pynsngap ha U Blei Trai Kynrad, da kaba la ia pan ruh na u ban ialam bad btin lynti ba ki kam ki jam jong ka jingpynkhreh pynkhrum kin iaid beit iaid ryntih, ka sur ka ksing ka tangmuri ban put ban tem da ki duhalia  kan da pah sngewbha kan da kynih sur ba bang,  khnang ba ki rang bad ki thei sotti ynda haba ki la mih lympung kin da da ioh ba kin da shad hun mynsiem.

Ia kine kiei kiei baroh, U Blei Trai Kynrad u la wan ba un pynpaw ia ki dak ki shin jong ka jingmynjur  ka jong u ia kane ka nguh ka dem, ha ka dur jong ka lengbah ka lengsan kaba kat kumba la iapan ki dak ki shin ki pynpaw shai kdar ba u Kynrad najrong na tbian u la sngew la sngap bad la kyrkhu najrong na tbian.

Hadien ba la dep ka nguh ka dem, la sdang pat ban tem ia baroh ki hynniew skit ki sur ksing bad nangne shakhmat man la ka nohphai sngi, ka Ksing ka Tangmuri kan riew bad kan sawa na phyllaw jong ka iing Seng ia kaban yn bynrap lang da ka jinghikai shad kaban long man la ka sngi naduh ka por 5 baje haduh 7 baje janmiet hapoh iing Seng, ha Mawkhar.

Ia kane ka sngi la wan ban sakhi lang da ki Vice President, General Secretary, Treasurer, ki dkhot jong ka Seng Kynthei, ka Seng Samla bad kumjuh da kid hot jong ka Jylli Pyrkhat Kam (JPK) ka Seng Khasi Kmie.