Sdang ka kam khlong maw khlong shyiap ki nong Bangla, hiar ki pyrton shipai BSF sha khappud India Bangladesh

Syllad | The Rising MeghalayaAugust 6, 2024

Hadien ka jingkhyllem noh ka sorkar kaba ialam da ka Myntri Rangbah Duh barim ka Ri Bangladesh, ka Sheikh Hasina naka jingklumar hapoh kane ka ri, ki nongshong shnong haka thain Bakur, Dawki kila sakhi ba ki nong Bangaldesh kila bun kam sa ka kam khlong maw khlong shyiap ha Barla, Synrem kiba lah ban iohi kyndiang na Bakur Dawki bad Umsyiem ki shnong kiba hap ha khappud India Bangladesh.

La iathuh ba kane ka kam khlong maw ka dei kaba la khang da ka sorkar Bangladesh la bun bun snem, hynrei mar sien khyllem ka sorkar kaba ialam ka Sheikh Hasina, ki nong Bangladesh kila mih da ka kynhun ban khlong bad lum iaki shyiap ki maw da ki lieng kynda na ka wah ha Barla bad ka Synrem, ki shnong kiba hap sha Bangladesh.

Ka khubor kaba iohlum ka iathuh ba haka por mynsngi kala don ka jinghuri hura sha Bangladesh haka thain Jaflong, ha kaba la iohi dak ki shin ba ka don ka jingthang iing na ka jingklumar ha ka kam sain pyrthei.

Ka dur kaba la saphriang kala don ruh ka jingtur ki nong Bangladesh ha Tamabil haka khyrdop ka tnad Custom, hynrei kam don satia kano kano ka jingjia kiba sngewsih.

Ka sorkar Meghalaya ban tem ia kano kano ka jingjia, kala shim rai ban pynjari da ka Korphiw miet bad phah iaki pyrton shipai sha khappud India Bangladesh. La sakhi ba ki shipai kila don haki shong khappud ban pynkhreh ban iada iaka ri.

Nalor kata ka nakaliang ki District Magistrate jong ka East Jaintia Hills bad West Jaintia Hills kila pynmih iaka hukum pynjari kurphiw miet katkum ka kyndon ain 163 BNSS ne ka Bharatiya Nagarik Suraksha Sanhita naduh ka por 6 baje janmiet haduh ka por 6 baje mynstep haduh 200 meter na u Zero Line (International Border) ban khang pyrshah ia ka iaid ka ieng jong ki briew ha khappud da ka jingthmu ban kyntur lane ban rung tuh sha ki jaka jong ka ri India.

Pynjari Night Curfew ha khappud Indo Bangladesh ha ki ar tylli ki district jong ka rilum Jaintia