Sdang ka lympung 83rd Senior National Table Tennis Championship ha sor Shillong

Syllad | The Rising MeghalayaApril 18, 2022

Ka lympung ialehkai Table Tennis ba heh tam ha ka ri, katta ka 83rd Senior National Championship la plie ia ka mynta ka lah sngi u Blei ha Multi Purpose Indoor Sports Hall jong ka Sports Authority of India, ba don ha kut ka skul bah pule North Eastern Hills University.

Kongsan ba la leit ban plie ia ka pyrda kane ka lympung bah ialehkai dei u shnongknor ka iing dorbar thawain ka jylla u Bah Metbah Lyngdoh, katba u symbud kongsan dei u Bah Banteidor Lyngdoh  Myntri ba dei khmih ia ka tnat Sports & Youth Affairs bad sakhi lang da kong WAM Booth (MCS) Director Sports & Youth Affairs, nangta u working president bad general secretary ka Meghalaya State Olympic Association u bah John F Kharshiing bad u bah Finely L Pariat, ki nongpyniaid ia kane ka lympung , ki rang bad ki thei ialehkai na ki jylla ka ri bad kiwei kiwei.

Shwa ka jingplie paidbah ia ka pyda kane ka lympung ialehkai u president ka Meghalaya Table Tennis asspociation u Bah RG Lyngdoh, u shim ia ka lad naka bynta ban pynpaw shwa ia ka jingsngew lem sha ka iing ka sem ka jong u samla ialehkai Table Tennis ka jylla Tamil Nadu u Deenadayalan Vishwa, uba la khlad noh  hynnin ka sngi, hadien ba ka kali tourist kaba la wan shaw ia u na kad liengsuin na Guwahati ynda haba ka la poi ha Shangbangla, Ri-Bhoi District, ka la shah tynrah ha kawei ka trok 12 shaka, bad ha kane ka jingjia u Vishwa u la duh ei ia la ka jong ka jingim, katba ki paralok ba ialehkai lang bad u ba la don ha kane ka kali ki la mynsaw.

Pule | Khlad u player Table Tennis ka Tamil Nadu haka aksiden kali ha Shangbangla Ri Bhoi District

Kum ka dak jong ka jingkynmaw burom ia ka mynsiem ba la leit noh jong u Vishwa, ka jingialang baroh kawei ka la pynlong ia ka jingsngap jar kaba shi minit.

Haba kren kum u kongsan, u Bah Metbah Lyngdoh u la pdiang sngewbha ia baroh ki rang bad thei ialehkai na baroh ki jylla jong bad pynpaw ruh ia ka jingsngew kmen ba un ioh ban wan ban plie ia ka pyrda kane ka lympung ialehkai.

U Bah Metbah u la pynpaw ruh ia ka khubor sngewlem ba un tip bad iohsngew shaphang ka khubor ka jingkhlad noh ka jong uwei na ki samla ialehkai table tennis ka jylla Tamil Nadu, hadien ka jingiatakhuh kali kaba la jia hynnin ka sngi u Blei ha Shangbangla, Ri Bhoi District.

Naka liang u Myntri ba dei khmih ia ka tnat Sports & Youth Affairs u Bah Banteidor Lyngdoh, u ruh u la ieng ban pdiang sngewbha ia baroh ki nongwan iashim bynta sha kane ka lympung ialehkai bad bynrap ba ha kine ki lai snem shiteng ka sorkar jylla ka thrang  ban kyntiew ia ka kam ialehkai ha ka jylla bad dei halor kane ka nongrim ba ka sorkar ka la shim ha ka ia ka jingkit khlieh ban wan shakhmat ban noh ia ka jingiarap pisa sha ka MTTA ban lah ha kaban wanrah naka bynta ban pynlong ia kane ka lympung ialehkai ha kane ka jylla.

Nalor katta u bah Banteidor u pyntip ruh ba ka sorkar jylla lyngba ka tnat sports kan khreh ban pynlong biang ruh ia ka lympung bah ialehkai ba heh tam ha ka jylla ka Meghalaya Games ba la dep ban pynkhi im biang ia ka ha u snem 2019 bad mynta ka kynti kane ka lympung kan long ha ka taiew ba nyngkong jong u bnai Jymmang bad ha u Risaw-Naiwieng mynta ka snem  ka sorkar jylla ryngkat bad ka MSOA kan pynlong ia ka lympung bhah ialehkai North East Olympic Games 2022, baroh kine ki dei kum shi bynta ka jingrakhe ia ka lyngkhuh snem ba 50 ka jingioh jylla ba pura.