Sdang ka Mawlai SC bad Rangdajied United ia u snem thymmai da ka jingjop ha ka lympung SPL

Syllad | The Rising MeghalayaJanuary 5, 2025

Ka Mawlai SC bad ka Rangdajied United FC ki la sdang ia u snem bathymmai da ka jingjop ha ka lympung ialehkai OC Blue Shillong Premier League 2024 kaba la long ha madan SSA First Ground, Polo ha ka 4 tarik Kyllalyngkot 2025.

Ka Mawlai kaba dei ka lahduh jong ka samoi ba la dep ka la hap ban iakhun tyngeh pyrshah ia ka Laitkor SC ban jop da 1-0 lyngba ka kol ba la ioh thep da u Baiaikara Swer (82’), katba ka Rangdajied ka la lah ban pynliem noh da kaba suk, kata da 4-0 pyrshah ia ka Nongthymmai SC lyngba ki kol ba la thep da u u Owanijuh Pajuh (1’), U Benny Khriam (41) bad u RT Hanson Pdang (88’, 90’+4).

Kane ka jingjop jong ka Mawlai SC ka la pynlong ia kane ka kynhun ba kan don biang ha ka kyrdan kaba halor eh da kaba ioh kamai 16-point, kata khlem da shah rem wat tang shisien ruh.

Ka Laitkor SC ka lah ban sngew ba ka la dei hok ban ioh ia ka penalty ha kane ka jingialehkai, hynrei ka jingshisha ka long ba kam shym la lah ban thep kol ha ki lai na ki sawtylli ki jingialehkai ba la dep bad ba ka donkam ban ioh thep kol. Katba ka jingjop jong ka Rangdajied ka mut ba ka Laitkor ka la hiar sha ka kyrdan kaba hynniew.

Hadien ka jingshah rem kaba arsien ban sdang ia ka OC Blue SPL 2024, ka Rangdajied mynta ka la jop sawsien lynter bad mynta ka la don ha ka kyrdan kaba saw da kaba kamai 12 point.

Watla ka dei ka sien shah rem kaba saw jong ka Nongthymmai, hynrei kane ka dei tang ka jingiakhun kaba ar ha kane ka samoi ialehkai ha kaba kam pat shym la lah ban thep wat tang shi kil ruh. Mynta ka Nongthymmai ka dang iakhaid ha ka jingkhur point bad ka Langsning, kata mar 7 point.

Ka jingialehkai ka ban wan kan long hapdeng ka Shillong Lajong FC pyrshah ia ka Nongrim Hills SC ha ka 6 tarik Kyllalyngkot 2025 ha ka por 2 baje nohpahi sngi ha Madan SSA First Ground, Polo, Shillong.