Sdang ka Meghalaya State League, jop ka Rangdajied FC ia ka 7 Wasa Utd

Syllad | The Rising MeghalayaMay 12, 2023

Ka Rangdajied United kala sdang da ka jingjop ha ka sngi sdang ka lympung Meghalaya State League 2023. Ka Rangdajied United kala pynliem ia ka Niaw wasa da 2-0 kol ha ka jingialehkai ba long ha madan Kiang Nangbah Stadium ha Jowai.

Ia ka kol ba nyngkong la thep u Wanlamsuk Nongkhlaw ha ka 34 minit jong ka kyllastep katba ia kawei pat ka kol la thep u Damehun Syih ha ka 60 minit ka kyllamiet ha ka jingialehkai ba la sakhi da da u paid nongpeitkai ba la pyndap smam iaka madan Kiang Nangbah

Ka kane ka jingjop kala pynlong ia ka Rangdajied United ban khur 3 point na ka jingialehkai ba nyngkong jong ka Group B.

Ia ka jingplie ia kane ka lympung la sakhi lang u myntri ka tnat ialehkai ka jylla u bah Shakliar Warjri kum u kongsan katba u MLA ka Jowai bah Wailadmiki Shylla ula long kum u symbud kongsan.

Ha ka jingkren jongu, u bah Wailadmiki ula ong ba ka jingialehkai kan ym long kaba shongshit khlem ki nongpeitkai bad ula kyntu ia ki paidbah ban ai mynsiem ia ki kynhun kampher lada rem ne jop.

Ula pynbna ba ka sorkar kala pynkhreh ban pynbha ia ka madan ialehkai bad ka jingtrei kan sdang shen.

Katba u myntri ka sports u bah Shakliar ula kyrmen ba ka jingtrei ban pynbha shuh ia ka madan kan sdang shen bad ia ka detailed project report la pynkhreh.

“Nga sngew kmen bad sngew sarong ban iohi ba ka kynjatbol ha ka jylla ka la kiew bha”, la ong u myntri.

Haba phai sha ka jingialehkai, ka Rangdajied kala ioh ban khyrwit mar ia sdang ka jingialehkai lyngba u Tremiki Lamurong hynrei la ioh kyrda noh u nongapdien ka Niaw wasa.

Kumjuh u Mediphrangki Pohleng ula ioh ban khyrwit hynrei kam shym la poi sha ka kol bad kham hadien u kapten u Pynishai Lathong u la jan ioh ban khyrwit da ka khlieh.

Ka Rangdajied kala ioh ia ka penalty ha ka 18 minit hynrei u Lamurong um lah ban thep. Dei kham hadien ba u Aibiangmame Nengnong ula ioh ban khyrwit tangba kam shym la rung bad u Wanlamsuk uba ioh ban khyrwit da ka penalty na ka jingdei ia ka kti u nongialehkai ka Niaw wasa.

Ha ka kyllamiet, ka Rangdajied kala nang skhem bad kala bteng  ban nion iaka kut ka Niaw Wasa.

Watla ka jingialehkai ka kut ha ka por 5 baje, ki don ruh shibun kiwei ki jingialehkai kynthup ka jingtem, ka jingrwai na ka Jessie Lyngdoh kaba shna ia ka jingrwai ka lympung MSL 2023.

Ha ka por ba plie, la pynshong shit da ka jingshad bad rwai.