Sdang ka MJA ia ka lympung iakob Judo ba la tip kum ka Asmita Women’s Judo League East Zone

Syllad | The Rising MeghalayaAugust 19, 2024

Ka Meghalaya Judo Association ka la lah ban sdang ia ka lympung jingiakob ialehkai Judo ba la tip ia ka kum ka “Asmita Women’s Judo League East Zone,” ha SAI Indoor Stadium, NEHU.

Ia kane ka lympung jingiakob ba saw sngi kynthih la plie pyrda da u D.D Shira, Director Sports & Youth Affairs ka sorkar Jylla ryngkat u General Secretary ka Meghalaya State Olympic Association u bah Finely L Pariat.

Ki khynnah ialehkai ba wan ba nyngkong bad ba-ar na kane ka jingiakob, kin khreh ban bteng ban mihkhmat pat sha ka kyrdan iakhun jong ka National level.

Ha kane ka jingiakob la shem bad sakhi ruh ba ki thei ialehkai ka jylla ryngkat bad kiba la shah pyntbit ialade ha SAI, STC, ki la pynpaw ia ka jingtbit bad ka sap ialehkai kaba nylla bha ka jong ki, kata kaba wanrah jingkyrmen ba lada biang shisha ka rukom pynlong ia kum kane ka jingiakob ha kane ka jylla, yn lah ban mih beit ki thei ialehkai ba kynsai ha ki lympung bah jong ka ialehkai Judo jong ka ri.