Sdang ka NHAI ban pyndap iaki thliew ki syar ka surok NH 6, khlem pyndem ka JAC

Syllad | The Rising MeghalayaJune 21, 2024

Ka National Highways Authority of India (NHAI) haka 20 tarik Jylliew kala sdang ban maramot iaka surok bah National Highway 6 ha East Jaintia Hills da kaba pyndap iaki thliew ki syar ban kham suk ki kali motor ban iaid ban ieng.

Kane kala wan jia long hadien ba ka JAC Dong Namchiang kaba kdup iaki 11 tylli ki shnong ha Narpuh Elaka naduh na Tongseng haduh Malidor kala pyneh triang khlem pyndem bad bteng ban pynlong iaka jingkhih pakhang surok. Kane ka jingpakhang surok kala sdang naduh 19 tarik Jylliew.

Kane kala wanrah iaka jingsangeh ka iaid ka ieng ki kali motor, kaba la ktah ia jylla jong ka thain sahtei lam mihngi, ka Assam, Mizoram, Tripura, Manipur bad ka Jylla.

Na kaliang ka bor district East Jaintia Hills District lyngba ka Additional Magistrate Kong JU Kharpuri haka 21 atrik Jylliew kala hiar sha Umkiang ban kyntu iaki nongialam ka JAC ban weng iaka jingiakhih namar ba kane ka surok ka dei kaba pyniasoh bad kiwei ki jylla.

Hynrei na kaliang u ma Lasting Pala, chairman JAC ula kren shai ba lada ka NHAI ka lah ban maramot iaka surok ban suk ka iaid ka ieng ka kali haduh Malidor, khlem pep kin weng iaka jingiakhih.

Ula ong ruh ba kane ka ishu kam dei kaba thymmai, lada shimkhia ka sorkar ne ka NHAI kan nym jia kumba long mynta haduh ba ka surok kan jot rathai bad dap da ki thliew ki syar.