Sdang ka PGT College ia ka jingrakhe dap 60 snem jong ka 

Syllad | The Rising MeghalayaSeptember 26, 2023

Ka College of Teacher Education (PGT), Shillong mynta ka sngi ba Ar ka la sdang ban rakhe ia ka jingdap 60 snem (Diamond Jubilee) jong ka ha ka jingialang kaba la long hapoh auditorium jong ka College.

Ha kane ka prokram la ia don lang ruh u Myntri ka Tnat Pule Puthi ka sorkar jylla u Rakkam A Sangma kum u Kongsan.

Haba kren ha ka jingialang plie ia kane ka jingrakhe, une u Myntri u la pyrto ia ka jingai jingshakri jong kane ka jaka pule kaba la pynmih da ki hajar hajar ngut ki nonghikai kiba aijingshakri ha ka liang ka pule puthi, bad ruh ban long ka rynsan na ka bynta ban pyntbit ha kaba iadei bad ka rukom aijinghikai.

Nalor kata u la ong ruh ba da ka jingkiew shaphrang jong ka jingstad teknoloji, ki brie ki la shaniah ha ka ha ki bynta bapher bapher, kumta u kyntu ia ki nong pule ban pyndonkam ia ka jingstad tynrai ka jong ki bad ban bud pud ha kaba iadei bad ka jingpyndonkam ia ka jingstad teknoloji.

Da kaba pynpaw ba ka lawei jong ka imlang ka sahlang, ka jylla bad ka pateng ka ban wan ka dei kaba la pynshong nongrim lyngba ki nonghikai,une u Myntri u kyntu ia ki nongpule ba kin shim ia ka jingkitkhlieh bad ka jingkut jingmut ban pynthikna ba iwei pa iwei kin long ki dkhot ba seisoh hapoh ka imlang ka sahlang.

Ha kane ka prokram na ka liang u Kongsan ha ryngkat kiwei pat ki heh ki hain ki la iashim bynta ruh ha ka jingpyllait ia u Logo bad Theme jong kane ka jingrakhe  Diamond Jubilee.

Kiwei kiwei pat kiba la wan iashim bynta ha kane ka prokram ki kynthup ruh ia u Bah H M Shangpliang, Adviser ka Tnat Education, u Bah W L Lyngdoh, IAS (Retd) bad President jong kaCollege Governing Body, Dr M A Jyrwa, Principal, College of Teacher Education (PGT) nalor kiwei pat.