Sdang ka pyntreikam ia ka Corona Care Centre ha Seng Khasi Hr Sec School

Syllad | The Rising MeghalayaJune 6, 2021

Ka jaka ban ai jingsumar ba shipor ne ka Corona Care Centre, kaba hap hapoh ka jingpeit bad khmih jong ka Dorbar Shnong Jaiaw, Laitdom bad ba la iarap ban pynbit pynbiang ia ka da da ka ophis jong Deputy Commissioner East Khasi Hills District bad ka ophis jong u District Medical Health Officer East Khasi Hills District, la sdang ban pyntrei kam noh ia ka naduh hynnin ka sngi Saitjain, ka 5 tarik nai Jylliew 2021 ha Seng Khasi Higher Secondary School (English Section), Jaiaw, Laitdom.

Ka jinglah ban plie ia kane ka jaka ban ai jingsumar kaba shipor, ka la wan hadien ba ka Seng Khasi Kmie, ka la shim biang ia ka sien jam ba kan tyrwa sha ki bor pyniaid ka district bad kumjuh sha ka dorbar shnong, ba ka seng ka kloi ba kan ai sngewbha shipor, ia kane ka iing skul ban lah ban pyndonkam kum jaka ban pynkoit pynkhiah ne ban sumar sukher ia ki briew ba la ioh ban kem ia kane ka jingpang, kaba mynta ka kynti ka la lynsher bha ia ka jylla bad ia ka nongbah.

Ia ki dawa ki dashin bad ki jingthiah bad kiwei kiwei ki jingdonkam la pynbiang da ka ophis jong DC EKHD bad kumjuh na ka tnat jong ka koit ka khiah bad kan dei naka bynta ki shynrang.

Shwa ban pyntreikam pura ia kane ka jaka ai jingsumar kaba shipor, ka la don ka jingialang ha mynshem jong kane ka skul, ha kaba la wan ban don lang ruh u MLA ka North Shillong u bah Adelbert Nongrum, u MDC Jaiaw Constituency u bah Paul Lyngdoh, ka Additional Deputy Commissioner ba dei artad ka Incident Commander  kong B. Ranee, katba na ka liang ka Seng Khasi Kmie, la mih khmat da u Assistant General Secretary Rgh Paia B Synrem, Social Secretary Rgh Da-oo-Hi Suiam, bad u samla rangbah ba dei u Asst. Publicity Secretary Seng Khasi Kmie u Hammar Sing Kharhmar.

Kiba la wan ban sakhi lang ia ka jingsdang ban pyntreikam noh ia kane ka jaka ai jingsumar ba shipor ka kynthup ruh ia u Dr M. Basaiawmoit DM&HO, nangta ki rangbah shnong bad ki dkhot nongkitkam jong ki 6 tylli ki dorbar shnong jong ka Jaiaw, ki nongtrei ka tnat ka koit ka khiah bad kiwei kiwei.

Ia ka jingialang la pyniaid ia ka da u Rangbah Shnong Jaiaw, Laitdom bah SB Kharbyngar bad ba la ioh ruh ia ka nguh ka dem ka dem, kaba la pyndep ia ka da u Chairman ka Komioti u Tymmen U San Seng Khasi Kmie Rgh Skor Jala.

Haba kren ha kane ka ka jingialang u bah Paul Lyngdoh bad u bah Adelbert Nongrum, kim lah ban khlem da pynpaw ia ka jingsngewnguh ka jong ki ia ki nongialam jong ka Seng Khasi Kmie, halor ka jinglong ba kloi ka jong ki ba kin shah sngewbha ia ki bor pyniaid ban pynlong ia kane ka iing skul kum ka jaka ai jingsumar ba shipor, bad khlem da klet ban pynkynmmaw ba ha u snem uba la dep, ka Seng Khasi Kmie ka la ai sngewbha sha ka dorbar shnong Jaiaw Laitdom ban pyndonkam ia kane ka iing skul kum ka quarantine centre.

Haba kren ha kane ka jingialang u bah Adelbert Nongrum MLA u pynpaw ba kum u nongmihkhmat un sa shim ne thaw ia ki lad ki lynti ba un noh ia ki lad jingiarap sha kane ka jaka ai jingsumar, katba na ka liang ka jong u bah Paul Lyngdoh u la wan shakhmat ban noh synniang da ka song pisa bad aiti ha u Rangbah Shnong Jaiaw Laitdom ba un lah ha kaban pyndonkam ia ka ha kane ka jaka ai jingsumar.