Sdang ka Shad Suk Mynsiem

Syllad | The Rising MeghalayaApril 10, 2021

Ka Seng Khasi Seng Kmie kala sdang ia ka ‘Nohkjat’ jong ka Shad Suk Mynsiem kaba la ju tip ruh kum ka jinglehkmen Pyrem ia kaba la ju pynlong manla u snem kum ka dak jong ka jingai nguh ia u Blei Trai Kynrad hadien ba la dep ka thung ka tep khnang ba kan biang ka rep ka riang bad ban roi ban pa ka kamai kajih mynta ka sngi Saitjaiñ ha madan Weiking, Jaiaw.

Kane ka Shad Suk Mynsiem kan neh 3 sngi lynter bad yn pynkut ha ka 12 tarik mynta u bnai.

La pynlong ia ka Shad Suk Mynsiem da kaba bud pyrking ïaki kyndon ban iada na ka jingpur stet jong ka khlam Covid-19. Ha kane ka sngi sdang la la sakhi ba ki don tang khyndiat ngut ki nongiashim bynta ha ryngkat ka sur ka ksing, ka bom bad ka tangmuri, hynrei kala long pat kaba shongkun.

U General Secretary jong ka Seng Khasi Seng Kmie u Bah PD Nongrum u la ong ba bad kila bud pyrkhing ia ki kyndon ba ka sorkar bad la rai ban shah ban shad tang 75 na ka 100 ngut ki nongshad ha kawei kawei ka kynta bad ka jingshad ka long tang shi kynta kynta na ka bynta kawei ka kynhun.

Na ka liang jong u Bah Paia B Synrem Assistant Secretary Seng Khasi Seng Kmie u ong “Ngi la ia duh thiah duh dem ha u snem ba la leit na ka daw jong ka khlam Covid -19 namar ba ngim la lah ban pynlong ia ka shad suk Mynsiem kum ha kiwei pat ki snem naduh ba la sdang ia ka naduh u snem 1911 ha madan Weiking. Hadien ba ka la don ka jinghiar na ka jingioh ia ka khlam bad hadien ba ka sorkar ka la plie ia ki lad ki lynti ia kum kine ki jingialum ialang, ngi ruh ngi la pan ia ka jingbit na ka sorkar bad hadien ba ngi la ioh ngi hap ban iashong ban pyrkhat bha ba kumno ba kiei kiei ba ngi leh kin nym wanrah ia kano kano ka khubor ka bym sngewtynnad”.

“Ngi la pynkhreh na ka liang ka jong ngi bun kiei kiei kiba donkam kum ki adong ki adit kumba ka sorkar ka la buh ngi la bud beit bud ryntih bad kane ka sngi nohkjat ngi kyrmen ha kine ki ar sngi ban wan ruh kin long kiba iaid beit iaid ryntih”, bynrap u Bah Paia.