Sdang ka Shad Suk Mynsiem ba lai sngi ka Seng Khasi Kmie

Syllad | The Rising MeghalayaApril 8, 2023

Ka Shad Suk Mynsiem ba lai sngi ba ju pynlong ïa ka shi sien shi snem ka Seng Khasi Kmie, Mawkhar Shillong, la sdang ïa ka haka sngi Saitjain.

Ha kane ka sngi ba sdang, la poi ban ïashim bynta da ki spah ngut ki nongshad kynthei bad shynrang bad kumjuh ki khynnah ba dang rit ban pyniphuh iphieng bad thaba hi khlek ka Lympung Weiking, da ka jingwan ban shat ki kjat sngi ba phyrnai jong ka sngi.

Ïa kane ka sngi ba sdang jong ka shad la juh tip ïa ka kum ka Shad Nohkjat bad ha shwa ban hiar sha Lympung Weiking, ka la don shwa ka jingïalum lang ki nongshad lem bad ki parakur parakha bad baroh ki dkhot nongkit kam ka JPK, ha phyllaw jong ka Hall ka Seng Khasi Kmie, ha Mawkhar.

Ha ka por 1:30  mynsngi, ki duhalia ki la sei ka ksing ka nakra ka tangmuri ban sdang ban tem ïa ka ksing Lumpaid, hadien kane u Rgh Paia B Synrem, Asst. General Secretary Seng Khasi Kmie u shim ïa ka bynta ban pynïaid pat ïa ka jingïalang,  hadien kane u Rgh Hainess Marbaniang, General Secretary Seng Khasi Kmie, u ïalam ïa ka jingduwai bad hadien kane, la sdang pat ka jingïaid kjat sha Lympung Weiking.

Ynda haba la poi ha lympung Weiking, shwa ban sdang ka shad, la ïoh pat ïa ka nguh ka dem kaba pyndep da ka Komiti U Tymmen U San Seng Khasi Kmie, bad  ka bynta ka jingkyntiew ïa ka lama ka Seng Khasi da u Rgh O. Pyngrope Vice Prresident bad  hadien kane la sdang pat ïa ka Shad Nohkjat.