Sdang ka SHG Mega Camp na Laskein Block ban rakhe iaka lyngkhuh snem ba 50 ka jingioh Jylla

Syllad | The Rising MeghalayaOctober 6, 2021

Haka sngi Balang la pynlong iaka SHG Mega Camp ha Shangpung, kaba hap hapoh ka Laskein Block kum shi bynta ban ithuh iaka jingshakri ki SHG ban kyntiew iaka ioh ka kot ka jylla haka ki thain nongkyndong. Ia kane ka SHG Mega Camp la pynlong da ka Meghalaya State Rural Livelihood Society (MSRLS) ban rakhe ïaka lyngkhuh snem ba 50 ka jingioh jylla ba pura ka jylla.

U Myntri ka tnad C&RD Bah Hamletson Dohling ula wan ban iadonlang kum u kongsan, u James PK Sangma Myntri ka tnad kam khlaw, ka koit ka khiah bad kiwei kiwei kum u symbud kongsan, MLA Raliang ma Comingone Ymbon nalor ki DC, SP ka District bad ki sahep sorkar.

Ia kane ka camp ka sorkar Jylla lyngba ka Meghalaya State Rural Livelihood Society (MSRLS) kan pynlong ha manla ki block.

U Bah Hamletson Dohling haka jingkren ula ïathuh ba haduh mynta hapoh ka Jylla ka jingdon ki SHG ka la kynjoh shaki 34 hajar tylli bad tang ha Laskeiñ Block ki don haduh 1697 tylli bad ha baroh ka West Jaintia Hills District ki don haduh 3253.

Ula ïathuh ba ka sorkar Jylla ha u snem ban wan ka la buh thong ban thaw haduh 44 hajar tylli ki SHG hapoh ka Jylla.

“Ka thong jong ka sorkar ban thaw ïaki SHG ka long ban rat dyngkhong ïaka jingduk jingkyrduh hapoh ka imlang sahlang,” la ong u Bah Dohling.

U James PK Sangma haba kren kum u kongsan ula iaroh iaki longkmie jong ki SHG jong ka shnong Shangpung bad kiwei ki shnong ba marjan halor ka jingtrei shitom jong ki ban kyntiew iaka imlang ka sahlang. “Ka jingbun ki longkmie kiba sengkam lajong kalong ka jingkyrkhu kaba khraw iaka imlang ka sahlang,” la ong u James.

Ula ong shuh shuh ka sorkar ka pynshlur iaki longkmie ban seng iaki kam lajong bad kan iarap ban kyrshan iaka jingdonkam ka jong ki.

U Bah Comingone Ymbon ula ong, naduh ba don ki SHG shibun ki jingkylla ki la wan hapoh ki shnong ki thaw. Ula kyntu ïaki SHG ban trei shitom bad ban kiar na ki jingsngew ïapher jingmut hynrei ban long borabor kiba ïadei jingmut para SHG khnang ban ïoh jingmyntoi ïalade bad ïaka ïing ka sem.

Kiwei kiwei kiba kren ki kynthup ia u Deputy Commissioner u Ma Garod LSN Dykes, IAS, PK. Boro Project Director DRDA bad Ïaka jingïalang la pynïaid da u Block Development Officer (BDO) u Ma Brightstar Langbang.

Haba kut ka jingïalang la pynkup burom ïaki Self Help Group (SHG).

Ïaka nam ‘Best Performing Village in SHG Saturation’ la ïoh da ka Manbha VO Mulieh, Rikune VO Iooksi Kyan Mynsar Thlong Mu, Wasakhi VO Mowkyndeng, Pynteinam VO Pyntei bad ka Pynjanai VO Muthlong Rim.

Ïaka nam Best Performing VO la ïoh da ka Synroplang, Thadmuthlong-A.

Best Performing FLC la ïoh da ka Banri Papiah, Sngewbhalang SHG na Thadmuthlong.

Best Performing ICRP la ïoh da ka Junemonth Suchiang, Dathranglang SHG na Shangpung Khliehmushut.

Best Performing BC la ïoh daka Emilia Sten.

Best Performing Branch da ka MRB Mowkaïaw.

Best Performing Branch for Social Security Scheme da ka MRB Shangpung.