Sdang ka Shillong Autumn Badminton Open Challenge

Syllad | The Rising MeghalayaSeptember 25, 2024

Ka iakob ialehkai badminton ba la tip ia ka kum ka Shilllong Autumn Open Badminton Challenge kaba pyniaid da ka Shillong Badminton Coaching Centre, kala sdang haka 23 tarik Nailur bad kan kut haka 28 tarik Nailur.

Ha kane ka lympung la phiah bad bynta ia ka jingiakob kyrpang naduh ki khynnah ba dang rit, ki samla bad kumjuh ia kiba la san la Rangbah, ha kaba  khusnam ia ki nongjop ka long kaba la pynap lypa ban sam sha ki nongialehkai ba ioh ban rah ia la ki nam jop na kane ka jingiakob.

Ia kane ka jingiakob la lah ban pynlong da ka jingkyrshan da ka Meghalaya AIDS Control Society, Meghalaya Tourism, Wellness Club, Umroi bad kiwei de.

U kongsan ba la plie ia ka pyrda kane ka jingiakob dei u Secretay ka Meghalaya State Badminton Association u Rajesh Kamal bad la ioh ruh ia ka jingkren na ka Kong M. Nongrum, Councellor jong ka Meghalaya AIDS Control Society.

Haba iakren bad u Secretary jong ka Shillong Badminton Coaching Centre u Rajesh Khana, u iathuh ba la seng ia kane ka shlem ai jinghikai ha u snem 2014 bad kane ka jingiakob ka dei ka sien jam ba nyngkong ba ka synjuk kan lah ha kaban pynlong ia ka.

Haba phai sha ka song pisa kaba la thmu ban pynlut ban ai ha kane ka jingiakob ka kynjoh sha ka 1.98 lak tyngka ha kaba ia ka jingiakob la pynlong naduh ka rta ialehkai jong  ki U-13, U-15, U-17, U19 haduh kiba la san bad rangbah ne ba la kynjoh 60 snem ka rta shaneng. Ki player barim na Guwahati bad kiwei ki sorbah ka thain Shatei Lammihngi kin wan shimbynta ha kane ka jingiakop.

U Khana u la pynpaw ruh  ba ka daw kaba pynlong ia ka shlem ai jinghikai ka Shillong Badminton Coaching Centre ban pynlong ia kum kane ka jingiakob ka dei hadien ba la lap bad shem ba kham niar ba ki nongialehkai kin ioh ban iakhun ha kiba bun tylli ki jingiakob, kaba buinsien ka jingiakhun ba lah ban ioh  kan long tang ka district bad ka state level, lait nangta ka nongbah ne wat ka jylla kam don than eh ki lympung iakhun ba kan lah ba kan pynlong khamtam lei lei ia ki khynnah samla.

U Khana u la iathuh ruh ba nangne shakhmat ka synjuk kan shim ia ka sien jam ba shi sien ha ka lai bnai kan ialeh ban pynlong ia kiba bun ki jingiakob.