Sdang ka skul na Jowai ban bsuh iaka kamrep hapoh klas

Syllad | The Rising MeghalayaJune 17, 2023

Ka North Liberty Higher Secondary School, kaba don ha Mookyrdup, Jowai haka sngi Saitjain ka plie paidbah iaka Vocational Course in Agriculture ban bsuh iaka kam rep ha skul khnang ban hikai iaki khynnah iaka rep ka riang. Ha kane ka juh ka sngi North Liberty Higher Secondary School kala pynkup burom ruh ïa baroh ki khynnah skul jong ka kiba la pass bha haka eksamin SSLC bad HSSLC (Arts bad Science stream) jong une u snem 2023 bad kala plie

Ka North Liberty Higher Secondary School kala pynkup burom ruh iaki nonglehkai athletic kiba ioh iaka takma ksiar, la sam ruh iaki award kaba kyrpang kaba la tip kum ka Creative Minds. Kane ka dei ka khusnam iaki khynnah skul kiba shimbynta ha ki prokram bapher bapher kiba pynlong skul na ka bynta ban pynbha pynmiat bad btin lynti iaki khynnah klas rit ban dro dur, thoh dur nalor kiwei kiwei ban shut iaka jabieng.

Ha kaba iadei pat bad ka Vocational Course in Agriculture, kane ka course ka dei kaba nyngkong ka ban sdang da ka skul ha Rilum Jaintia. Ka jingthmu ban sdang ia kane ka course kaba iadei bad ka kam rep kam riang kalong ban hikai ia u/ka khynnah skul ban ioh jingtip ban rep ban riang ban thung iaki syntiew ki skud bad haduh u pud ba kin lah ban pynmih ia u mar rep bad ban die sha iew.

U kongsan ba plie bad pynkup burom ia ki khynnah u dei u Deputy Chief Minister ka Jylla ma Sniawbhalang Dhar haka jingiadonlang ka symbud kongsan Kong AP Syiem District School Education Officer, West Jaintia Hills District, u District Sports Officer, West Jaintia Hills ma Khroobok Passah, U Dolloi Elaka Jowai ma Puramon Kynjing nalor ki waheh shnong ka Jowai bad ki Marjan shnong bad kiwei kiwei kiba shah khot sngewbha.

U Principal ka school North Liberty HSS Babu Richard B Uriah ula pynbna ruh ha kane sngi 10 ngut ki khynnah skul kiba la ioh palat 80 percent kin ioh iaka scholarship ne ki ba ioh rung klas haka XI Science khlem da hap ban siew eiei ban leit skul.

Ula iathuh ruh ba u wei pat u khynnah ialehkai sports u Kynsai Bareh uba pule ha kane skul ha kane ka skul na ka sports quota hadien ba u la pyndep bad lehbha iaka matrik bad namar ba u don ka jingthrang ban pule da ka science stream, ula ioh biang ban bteng iaka jingpule ha kane ka skul da ka scholarship.

Ha kane ka kynti haka SSLC ki don haduh 93 ngut kiba shah pynkup burom, 61 ngut haka HSSLC Arts bad 53 ngut haka HSSLC Science. Kine ki kynthup iaki lai ngut kiba rung haka First Twenty na ka SSLC. Kine ki kynthup ia ka Reesa Ee Christine Suting kaba la wan haka kyrdang 11, u  Mendelson M Langstang ula wan haka kyrdan 14 bad ka Rilanaika Sari kaba la wan haka kyrdan 20.

U Babu Richard ula iathuh ruh ba ha kaba iadei bad ka coaching NEET bad ka JEE Main ka coaching iaki khynnah ka dang iaid shakhmat ha kane ka skul. Ula ong 6 ngut ki khynnah skul kila ioh pule da ka quota Meghalaya ban pule MBBS hadien ba kila pass iaka entrance bad bun bah ki khynnah skul na kane ka skul kiba pule haka lain engineer.

U kongsan ma Sniawbhalang Dhar ula iaroh ia u principal ka skul Babu Richard uba la kylla long u nonghikai na u engineer ban sam ka jingnang jingstad bha tam ha Rilum Jaintia. Bad ula kitok kitrwiang ia ka skul bad ki nonghikai ban nangtreishitom shuh shuh ha kaban sam iaka jingnang jingstad ban mih khraw pyrkhat ka imlang ka sahlang.

Haba kyntu iaki khynnah skul ula ong ba ki khynnah ki dei ban don ka mynsiem iakhun ban jop haka jingim pule puthi bad ban long kita ki myntoi ka imlang ka sahlang.