Sdang ka State Level Chief Minister Inter School Athletic Meet 2022 ka DSYA

Syllad | The Rising MeghalayaMay 31, 2022

Ka lympung bah ialehkai athletic ki skul ka jylla ba la tip ia ka kum ka Chief Minister State Level Athletic Meet 2022 ba la pyniaid ia ka da ka Directorate of Sports & Youth Affairs ka sorkar jylla, la sdang iaka naduh hynne ka sngi Hatmajai jong ka taiew, ha madan ialehkai jong kla SAI SAG ba don ha kut ka skul bah pule North Eastern Hills University.

Ka jinglah ban pynlong ka tnat sports ia kane ka lympung ka wan hadien ba ha kine khyndiat taiew kiba la dep, ka la lah shwa ba kan pynlong ia ka District Level Inter School Athletic Meet, kaba ha kane ka sien ba mynta, la lah ban pynlong biang hadien arsnem ka jingpynsangeh noh ia ka, naka daw ka jingwan ban lyngshop ka khlam jingpang Covid 19, kaba la pynduh lah bha ia ki khynnah skul ka jylla ban ia mih lympung ban ia tynjuh bor ne ban ia pyni ia la ka jong ka sap kaba ki don.

U kongsan ba la wan ban kyntiew ia ka lama jong ka jingsdang kane ka lympung ialehkai dei u Shivnash Awasthi (IAS) Under Secretary  ka tnat Sports & Youth Affairs ka sorkar jylla bad don lang ruh u working president ka Meghalaya State Olympic Association u bah John F. Kharshiing, nangta ki District Sports Officer jong baroh ki distrik ba don ha ka jylla bad ki khynnah ba ialehkai.

Haba kren kum u kongsan u Awasthi ula pdiang sngewbha shwa ia kumba 700 tam ki khynnah shynrang bd kynthei na kylleng ki skul ba don ha ka jylla kiba la wan ban iashim bynta sha kane ka jingiakob ha kaba u la ong ba ka jinglah ban wan ban iashim bynta jong ki khynnah ka kren shai ba ki la long lyupa ki nongjop ha kane ka jingiakhun.

Nalor katta u la ong ruh ba kum ka jylla kaba dang khreh ban jam shakhmat ha kaba ka sports kadei kawei na ki bynta kiba kongsan, kum uwei na ki ophisar ka jylla ba khmih ruh ia ka tnat, ka juh buh ha ka ia ka thong bad katta ka long ban pynbiang ia kiba bun ki rynsan iakob kiba kum kine, khnang ba ki samla ialehkai kin lah ban mih paw katta ka sap kaba ki don bad ruh ban lah ban wanrah ia ka nam bad burom ia ka jylla.

Shuh shuh u Awasthi u la ong ruh ba ki khynnah ba don ia ka sap, ka tnat kan shim khia ban bteng ha kaban ai shuh shuh ia ki prokram ai jinghikai ne kilan kiba paka khnang ba kin bteng shuh shuh ban phrang ioala jinngim ialehkai da kaba kin mih madan ban iakhun pat sa ha kiwei pat ki rynsan ialehkai ba kham heh ha ka ri.

Haba iadei bad kane, u Awasthi u la ong ba na ka liang ka tnat ka la pynkhreh ban bteng ha kaban nang pynlong shuh shuh ia kiba bun ki lympung ialehkai kiban long baroh shi snem da ka jinglah ban pynklong ia ka lympung ialehkai ka Meghalaya Games, ka jingpynkhie im biang iaka Mission Football khamtam ia ki shlem sain dur ba tip kum ki grassroot centres kiban sdang ban tyllun biang shakhmat naduh u bnai u ban wan khlem da klet ia ka jingpynlong biang iaka Subroto Cup bad ka jingthmu ban pynlong ia ka lympung bah ialehkai ba heh tam ha ka thain shatei lam mihngi ka North East Olympic Games.

Ha kane ka jingialang plie la ioh ruh ia ka kyntien pdiang sngewbha na u bah PB War Nongbri Assistant Director Sports & Youth Affairs bad bha la bynrap da ka jingpynlong pat ia kiba bun ki jingiakob.