Sdang ka taiew lehkmen ka Loompyrdi Iongpiah UP School

Syllad | The Rising MeghalayaAugust 22, 2023

Ban iohlad ki khynnah ban pynpaw pyrthei iaka sap ka phong kaba ki don nalor ka pule puthi, ka School Managing Committee jong ka Loompyrdi Iongpiah UP School, Jowai haka sngi Nyngkong kala sdang iaka School Week kaba 13 ha Yungwalieh ka Loompyrdi Iongpiah.

Ia kane ka School Week la wan ban plie iaka da u President bathymmai ka Seinraij Jowai Ma Hercules Toi, haka jingdonlang u Ma CA Ram Kyndiah, Secretary SMC, u Ma Bimi L Suwer, General Secretary Loompyrdi Iongpiah, ki dkhot ka School Managing Committee ba kynthup ia u Ma W Challam bad u Ma KF Laloo nalor ki nonghikai bad ki khynnah skul.

Iaka jingialang la pyniaid da ka Kong Dariker Lato, Asst. Teacher bad la ioh ka jingkren pdiang na ka Kong Sanki Toi, Asst. Headmistress, ka nguh blei nguh syiem na u Ma BM Shylla, Asst. Teacher.

U Ma Hercules Toi haka jingkren ula kyntu iaki khynnah ban long ki khynnah kiba shlur ban iashim bynta ha kino kino ki jingiakop bad ban buh iaka jinglehrain shadien namar kane kadei ka lad ka kabu ksiar ban sngewthuh kaei ka sap kaba phi don.

Shuh shuh ula kyntu iaki khynnah ban nang ban kheinkor iaka por bad ri syndong iaka burom ka akor kaba dei ka spah ba khraw haka longbriew manbriew kumjuh iaka iing ka sem.

Ka Kong Nitu Chullai, Headteacher Loompyrdi Iongpiah UP School ka la iathuh ba ia kane ka School Week la don shibun ki jait jingiakop ban iohlad ki khynnah ban pynpaw iaka sap bad ki rukom ialehkai pynbyrngia bapher bapher ki ban pynsngewtynnad iaka jingsngew jong ki khynnah bad ia kane ka School Week un pynkut haka 25 tarik Nalar.