Sdang ka taiew lehkmen leh sngewbha ka Loompyrdi Iongpiah

Syllad | The Rising MeghalayaDecember 12, 2023

Ka Khynroo Khyllood Committee jong ka Loompyrdi Iongpiah haka 10 tarik Nohprah ka la sdang iaka taiew lehkmen leh sngewbha kaba la pynlong ha madan Mynkoipyrdi Iongpiah haka jingsakhi lang ki longkmie longkpa bad ki samla.

Iaka jingialang la pyniaid da u Ma Bimee L. Suwer Waheh shnong Loompyrdi Iongpiah bad la ioh ka jingnguh blei nguh syiem na u Ram Kyndiah, Secretary Education Committee.

La ioh ki jingkren kyrpang na u symbud kongsan u Ma KF Laloo, Ex-Waheh shnong Loompyrdi Iongpiah bad na u Wander Shylla, Ex-General Secretary, Loompyrdi Iongpiah uba long kum u kongsan jong kane ka sngi.

Ka Organizing Committee, haka thong ban pynjanai iaka rukom treikam ka la thaw iaki saw tylli ki kynhun kiba tip kum ka Latuthin, ka Lasyntem, ka Lasubon bad ka Jaluba bad ka phang ne ka mat kyrpang jong une u snem ka long ‘Nongrim da sikai ya I, u Yachankylliang-Chirup Chilang u Tia Chaphrang’.

U Ma KF Laloo haka jingkren ula iaroh iaka jingiohi jngai jong ki nongialam ka Dorbar Shnong ryngkat ka Khynroo Khylood ban pynlong ia kane ka prokram bad ula pynkynmaw iaki por kiba la leit noh ba ka dong ka shnat ka don hapdeng ki jingkylla bad u pynkynmaw ruh iaki samla kiba ju kit ju bah iaka khia ka shon haka imlang sahlang ki bym don shuh ha sla jong kane ka pyrthei shong basa.

Ula kyntu iaki khun samla ban long ki pateng kiba imsngi ban bud nuksa ia kaba ki riew rangbah, ki longkmie longkpa kane ka juk kaba mynta ka pyni bad hikai khnang ba ka lawei jong ki bad lawei jong ka dong ka shnat kan ioh iaka nam ka burom.

Na ka liang ki khun samla ka Loompyrdi Iongpiah kum shibynta ban pynbyrngia iaki nongwan sakhi ki la pyni iaka jingshad pliang ha ryngkat ka riam ka beit kaba ishongkun shongkhia bad iphuh iphieng.

Kum ka dak ka jingsdang jong ka Loompyrdi Iongpiah Week 2023, u Ma Wander Shylla kum u kongsan hadien ka jingkren ula pynher ruh iaka Din Kum.