Sdang biang ka thma um ha ki ar shnong ha East Jaintia Hills

Syllad | The Rising MeghalayaApril 20, 2024

Ka don ka jingong ba ka thma bah kaba lai, ka ban wan jia ka dei ka na ka daw jong ka um, bad kine ki dak ki shin kila paw tynkrein ha ki jaka ba tih iaki mar poh khyndew bad saiñ iaki mar poh khyndew.

Kane ka jingjakhlia ka um kala wan jia long haka shnong Nongsning bad Umrasong bad ka daw ka dei na ka jingthmu pynieng iaka karkhana saiñ rnga dewiong ne Coke Factory kaba la tip kum ka Prisidium Breeze kaba don ha khappud kine ki ar shnong ba hap hapoh ka Elaka Sutnga, East Jaintia Hills District.

U Waheh Shnong Nongsning u Bah Dipsing Bareh ula ong, ha kaba iadei bad kane ka karkhana Coke, na ka liang ka Dorbar shnong Nongsning ka la dep ban buh ki jingujor naduh u snem 2022 sha u Deputy Commissioner ka East Jaintia Hills bad kiwei kiwei ki bor halor ka jingshah ktah ka umbam umdih kine ki ar shnong.

Lah ban pynkynmaw ba Meghalaya State Pollution Board (MSPCB) ha ka 9 tarik Rymphang 2024 kala ai show cause notice ia kane ka karkhana Prisidium Breeze bad bthah ban pynkhuid iaka sawdong sawkun ka jaka pynieng karkhna bad ban pynthikna ba ki umbam umdih kim dei ban shah ktah.

Pynban haduh mynta kane ka karkhana kala leh bymsuidniew iaka kane ka jingbthah ka MSPCB, la kynnoh u waheh shnong ka Nongsning.

Hadien kane u paidbah nongshong shnong ka Nongsning Umrasong kila mih paidbah ban pyrshah ia kane ka karkhana bad ha kajuh ka por ka ka MPSCB kala jurip ia kane ka karkhana bad la bthah iaka ban khang shipor.

U Waheh Shnong Nongsning, Dipsing Bareh ula ong ba kane ka um ka dei kaba jakhlia tam bad ula kyntu iaka sorkar ban shimkhia ban peit iaka jingeh ki nongshong shnong ba kin ioh iaka um bam umdih kaba khuid.