Sdang ka Umlyngsha Inter Dong Football League

Syllad | The Rising MeghalayaAugust 19, 2019

KHLIEHRIAT: Ka Umlyngsha Youth Society Sports Club (UYSSC), Elaka Lakadong, East Jaiñtia Hills District Khliehriat kala pynlong iaka lympung ialehkai football kaba la tip kum ka “Umlyngsha Inter Dong Football League 2019” haka 15 tarik une bnai Nailar ha Madan Lumthangiong , Umlyngsha.

Ha ka jingiakhun kaba nyngkong hapdeng ka Dong Mainroad RBBJ FC pyrshah ia ka Dong Khadlynraw FC ha kaba ka Dong Khadlynraw FC kala khur iaka namjop da 3-4 kol.

Haka jingialehkai kaba ar ka Dong East Colony FC pyrshah ia ka Dong Lumpyrdi FC ka jingiakhun kala wai khlem don mano mano ba ïoh thep kol.

Shuwa ban sdang ka jingïalehkai football inter dong la don ka jingialang kaba lyngkot bala pyniaid da u samla Namphrangmi L Tlang General Secretary UYSSC ryngkat ka jingiadonlang ki dkhot jong ka club haba u pynpaw iaka jingangud jong ka club ban kyntiew shaphrang ia kane ka lympung ialehkai Inter Dong khamtam mynta u snem ka Club kala rai ban ai ia ki dong ba rem bad ba jop haka phainal ryngkat ki Trophy, Medal bad ka song pisa.

U Ma  Rangbah T.Dkhar, u la ai ia ki kyntien sneng ia ki nongialehkai haba u la kyntu ia ki ban long ki briew kiba ia map kylliang khamtam ha madan kan don beit ka jingiabakla bad u la kyntu ruh ban don ka mynsien sngewrit khnang ban kiew ka kyrdan longbriew manbriew.

U Tbn. K Shylla uba long kum u kongsan u la kitbok kitrwiang ia baroh ki saw dong kiba iakhun ban iaknieh iaka namjop ha kane ka lympung kin ialehkai bha bad u la ong haka jingialehkai kan don beit ka kynhun kaba rem bad ba jop, hynrei uba jop ym dei pat ban sngewsarong bad uba rem pat ym dei ban duh jingkyrmen bad nang ïai treishitom ban jop haka jingim ïalehkai.