Sdang khynniuh ki Seng Sain Pyrthei ha ka Jylla

Syllad | The Rising MeghalayaSeptember 19, 2021

Ki Seng Sain Pyrthei kiba don hapoh ka jylla Meghalaya ki la sdang ba kin ia khynniuh bad mih paw ki dak jong ka jingorpait, hadien ka jingkylla jong ki nongkit kam, bad kaba itynnad lei lei ka long ba wat lada kam shym la don satia ka jingiapynpaw ne bym ia hun ia ka rukom ban jied nongialam, pynban ki kam hi ki kren shai kdar ban ia ka ktien, kaba lehse u paidbah uba stad ba shemphang mynta u la shem bad iohi lut ia kaei kaba la jia.

Ka jingpep leit u nongialam ka liang pyrshah bad ha ka juh ka por u nongialam jongka Congress Legislative Party (CLP) hapoh ka Iing Dorbar Thawain ka jylla u Dr Mukul Sangma sha ki artylli ki prokram ka seng Congress ba kynthup ia ka jingpdiang rung dkhot ia san jngut khamtam ia u bah R.G Lyngdoh, bah Pynshngain Syiem bad kiwei kiwei bad ka jingbym shym la poi shuh syndon wat ha ka jingai aiti ne shimti kam jong ka Meghalaya Pradesh Congress Committee, ki pynpaw ia kane ka dak jingkhynniuh ha ki ki seng sain pyrthei hangne hapoh ka jylla Meghalaya.

Ban shu ia kren beit ia ka jingshisha, ka Congress wat ha ka ri hi baroh kawei, man la ki jylla kiba ka dang don, kam lah satia ba kan wanrah ia ka jingiaid beit iaid ryntih hapoh ka party ka jong ka, katno tam lei lei kaba mynshwa ka la don wat ka jingiapynher shithi da ki nongialam ba snar bad ba la rangbah jong ka seng, ban dawa  ia kata ka jingdonkam ban wanrah noh ia ka jingkylla ha ki nongialam, hakaba ki la don ruh kiba pynpaw ba lada ka Congress ka dang pyniaid da ka iing ka sem ki Gandhi, ka seng hi nangne shakhmat kam lah shuh ba kan poi shano shano ruh.

Kane ka jingmaham da ki nongialam kiba la rangbah ka la wan ba kan mihpaw haduh ka jylla Punjab kaba satang khyndiat por kan khreh ba kan leit sha ka elekshon, hynrei u Capt,. Amrinder Singh u la rai ban hiar noh shi syndon na ka shuki kum u myntri rangbah jong ka Punjab, kaba hangne ruh ka daw ka dei namar ka jingbakla ban jied nongialam.

Lada yn ia phai biang sha la ka jong ka jylla, ka 2023, kan dei biang ka snem, kaban wanrah ia ka jingkylla ha ka liang ka sain pyrthei, hynrei lada sdang ban buddien lypa naduh mynta, kumba mihpaw na ki dak ki shin, ka Congress kan khreh ba kan pra, hadien  ba u Ma Vincent H Pala, u la bat mynta kum u nongialam jong ka MPCC.

Ban shu ia kren ka Congress hangne hapoh ka jylla haba ia nujor bad kiwei pat ki seng sain hima kiba don, ka long ka seng kaba bat bha ia kata ka kyntien ba juh ong ha ka ktien phareng ‘discipline’ kaba bunsien wat haba la wan ban mihpaw ka jingkynad, hynrei ha kaba kut, ka rai na ki bor ba halor na Delhi ne ka High Command, la juh pdiang bad pyniaid ia ka  party, dei kane, kaba iai pynlong ia ka Congress kum kawei na ki party kaba u paidbah u ieit u da niew burom bad pdiang ia ka kum ka party kaba don shisha ka nongrim ki jong ka.

Pynban, ha kine ki khyndiat snem namar ka jingiapher jingmut kaba la kyan lypa naduh na nongbah Delhi, da kumta ha kane ka kynti kaba mynta, wat hangne hapoh ka jylla Meghalaya, ym lah ban tip ba ia kata ka discipline jong ka Congress yn dang lah ne em ban pynneh, bad lada lah ban pynneh, ha kano pat ka rukom yn lah, kane kan long ka drama, kaba itynnad ban ia khmih ha kine ki arsnem shiteng shwa ba ka jylla kan leit sha ka elekshon.

Haba phai sha ka seng NPP ba ialam ia ka sorkar MDA, ka ruh ka don ia la ki jingeh, katno tam lei lei ba ha ka iing dorbar synrai kaba dang shu dep ban long shen, u Conrad K Sangma, u la shah thalain na kadiang na kamon ha ki liang pyrshah, khamtam lei lei na ki MLA ka Congress, kiba la kdong shisha ha kyndong ia kane ka sorkar MDA kaba mynta, kaba la pheil lut kat shaba phai.

Kaba kham ima lei lei  iaka sorkar jong ka MDA ka long ba na ka por sha ka por, ka la don ka jingpynkylla ia ka rukom bate kam ne portfolio ha la ka jong ka kynyhun myntri bad shuh shuh ka jingthung ia u bah AL Hek bad kumjuh ia u bah Ernest Mawrie kum ki Adviser ia u Chief Minister ha ka sorkar kaba mynta.

Kumta ia mynta u paidbah un hap shwa ba un ia khmih kai narud nakiar shano ka jingkhynniuh ki seng sain pyrthei kan ialam, bad tang kawei kaba kham paw shynna hi ka ong ba  imat ym I slem ba ha kine ki arsnem shiteng, imat kan sa wan ba kan mihpaw kawei na ki seng sain hima kaba thymmai hangne hapoh ka jylla, kaba mano ban ialam bad mano ban ia synrop ban pyniasnoh kan dang iai long pat ka drama, kaba u paidbah un khreh ban sakhi nangne shakhmat.