Sdang ki nonghikai SSA iaka jingiakhih khlem pud bym pynkiew tulop ka Sorkar 

Syllad | The Rising MeghalayaOctober 2, 2024

Ki nonghikai skul SSA hapoh ka lama jong ka All Meghalaya SSA School Teachers Association (AMSSASTA) ha ka 1 tarik Risaw ki la sdang ia ka jingiakhih da kaba shong kyllain mungor ba khlem pud ban pynpaw pyrshah halor ka jingbym lah jong ka Sorkar Jylla ban pynkiew tulop mynta lah phra snem kynthih.

Kane ka jingshim rai jong ki nonghikai SSA ban iaid shakhmat ia ka jingiakhih ka jong ki ka la wan long ruh  hadien ba ka jingaipor ba 19 sngi ia ka Sorkar Jylla ka la kut noh ha ka  30 tarik u Nailur.

Haba kren sha ki lad pathai khubor ha Madan Malki, u General Secretary ka Association u Bah Wanpyndaphi Lapang u la ong, “Ngi la shim ia ka rai ban pyniaid shakhmat ia ka jingiakhih shong kyllain mungor kaba khlem pud hadien ba u Myntri ka Tnad Pule Puthi u Rakkam A Sangma u la pyntip sha ngi (ha ka jingialang bad u ha ka 30 tarik Nailur) ba na ka liang ka Sorkar kan sa dang shim ia ka rai ha kaba iadei bad ka jingdawa pynkiew tulop kaba 100 percent da ki nonghikai SSA.”

“Ka Sorkar ka la pynkiew khatduh eh ia ka tulop naduh u snem 2016. Hadien lai snem, kata ha u 2019 ngi la kyrpad ia ka sorkar ba kan pynkiew ia ka tulop jong ki. Hynrei phra snem ki la iaid kane ka jingkyrpad kam shym la poi shano shano ruh, kumta kane ka la pynlong ia ki nonghikai ba kim don lad da kumwei pat hynrei ban mih sha surok ban dawa ia la ka jong ka hok,” u la ong.

Nalor kata u la ong ruh ba kane ka jingleh bym suitniew jong ka sorkar ka la ktah jur ia ki nonghikai SSA namar ki la shem shitom shitom ban lah ban pyndap ia ki jingdonkam ba man la ka sngi na ka bynta la ki jong ki iing ki sem khamtam hapdeng ka jingkiew dor jong ki mar ki mata khamtam ki marbam mardih.

Haba kylli, une u nongialam ka Association u la ong, “Ngim lah ban ong ei ei halor ka rai jong ka sorkar. Hynrei, ngi sngew ba lada ki sorkar ba la leit noh ki lah ban pdiang ban pynkiew ia ka tulop jong ngi, balei kane ka sorkar kaba mynta? Na ka liang u Myntri Rangbah u la ju kren ba ka pule puthi ka dei kaba don ha ka thong kaba hakhmat eh ka jong u, hynrei balei pat u la kyntait ia ki nonghikai? Lada ka sorkar ka don pisa ban pynlut ha ki tamasa bapher bapher ngim lah sngewthuh kumno kam don pisa ban khmih na ka bynta ka bha ka miat jong ki nonghikai ha ka Jylla.”

Da kaba pdiang ba kane ka jingiakhih kan ktah ia ki hajar ngut ki khynnah ha ki skul SSA ha ka Jylla, u Bah Lapang u la ong, ” Kane ka dei ka jingiakhih jong iwei pa iwei ki nonghikai bad kane ka mut ba ki nonghikai kin ym leit sha skul tad haduh ba ka sorkar kan long la khreh ban pynsngap ia kane ka jingdawa pynkiew tulop ka jong ki.”

“Ngi la dep ban pyntip sha ki Managing Committee jong ki skul halor kane ka rai ka jong ngi bad ngi kyntu ia baroh ki nonghikai ba kin iasnokti lang ban pynbor ia ka sorkar ba kan pdiang halor kane ka jingdawa pynkiew tulop kaba la slem bah,” u la bynrap.