Sdang ki nongrep ha Pynthorneiñ ban rep kba ryngkat ki dohkha, khang khwai 2 snem ha Wah Myntdu

Syllad | The Rising MeghalayaAugust 30, 2021

Ban kyntiew iaka ioh ka kot jong u paidbah nongrep, ka Myntdu Pynthorneiñ Farmers Welfare & Producer Organisation (MPFWPO) ka seng kaba peit iaka bha ka miat u nongrep kala sdang iaka jingrep kba ha ryngkat ki dohkha ne kaba la tip kum ka ‘Paddy Fish Culture’.

U Pyntngen Kyndait, general secretary Myntdu Pynthorneiñ Farmers Welfare & Producer Organisation (MPFWPO), ula ong mynta ka kynti kila sdang ban rep dohkha tang ha kawei ka lyngkha bad ha ki snem ban wan kin pynshlur sa ia kiwei kiwei ki para nongrep ban rep iaki dohkha ha ki lyngka jong ki.

“Ka jingthmu ban rep ia u kba ryngkat ki dohkha, ka dei naka bynta ban kyntiew iaka lad kamai jakpoh jong ki nongrep kiba im japkpoh na Pynthorneiñ kaba kynthup iaka Jowai, Khliehtyrshi bad ka Mihmyntdu,” la ong ma Kyndait bad bynrap ba kin nongrep kila sdang ruh ban rep iaki jhur ki jhep marsien da ka aiom ot kba ha ki hali ki pynthor  jong ki mynta.

U Ma Kyndait ula ong shuh shuh ba hadien ba kila pyrshang ban rep ia u symbai kba uba la tip kim u CAU-R1 haka aiom bala dep, mynta kila rai ban nang pynroi shuh shuh ïa une u symbai da kaba sam sha kiwei ki para nongrep.

Une u symbai kba ka Central Agriculture University, Umroi Ri Bhoi District u iadei sha kane ka thain bad haka aiom kaba la dep ki don da ki spah ngut kiba rep ia une u jingthung.

Ka MPFWPO kala dep ban ai dorkhat sha u Deputy Commissioner West Jaiñtia Hills district bad sha u Divisional Soil & Conservation officer (T) West Jaintia Hills District ban shna pynbha bad iada iaki tyllong um ha Myntdu Pynthorneiñ baroh kawei kiba tuid sa ka Wah Myntdu.

Ka MPFWPO kala maham ruh ia ki bret kiba bret pathar ïa ki plastic, ki nuit, ki khyndew bad kiwei kiwei ki jingbret kiba ktah ïa ka um ka wah na Riaturiem, na Jowai by pass Mihmyntdu bad Khliehtyrchi bad na ka surok na jingkieng Myntdu sha Salini Colony Mihmyntdu. Lada  lap ka Myntdu Pynthorneiñ Farmers Welfare & Producer Organisation kan shain da ka kuna bad ban pynshitom katkum ki kyndon treikam jong ka seng.

Ha kajuh ka por na ka bynta ban ïa da ïa ki stiar jong ki hali bad ïa ki doh um ha ka wah Myntdu na ki nongkhwai dohkha kiba mlien ban pyndonkam da ki dawai ban pynïap ïa ki dohkha, da kaba pynkhein ïa ki stiar hali bad pynryngngad ïa ka um ha wah Myntdu ha Pynthorneiñ, kala khang pyrshah ban ym shah shuh ban khwai ban tong dohkha bad da kiwei kiwei ki lad ban ïoh dohkha ha baroh shilynter ka wah Myntdu.

“Kane ka jingkhang ban khwai kadei ha shi lynter ka Wah Myntdu na ka liar Tyrshi ha Pynthorneiñ na ka bynta ar snem pura naduh u bnai September (Nailur) 2021 haduh da pyntip da kumwei,” la ong ma Kyndait bad ula bad ka synjuk kala maham tyngeh ba lada ka lap bad ïoh kem kan pynshitom da kaba daiñ kuna ne haduh ban aiti sha ka bor jong ka aiñ sorkar.  

La kyntu ïa baroh ki nongshong shnong bad kiba ïaid lynti ha shilynter ka Myntdu Pynthorneiñ ban sngewbha ban ïa trei ryngkat ryngkat bad ki nongrep bad ki trai lyngkha, namar ba ka MPFWPO kan pyntreikam ïa kitei ki kam baroh, dei na ka bynta ban im u Kba ban ïoh Khaw bad ban ïoh um ïoh lyer ki nongshong shnong lyngba ka wah Myntdu bad ka Tyrchi ka tyllong um ha baroh kawei ka Myntdu Pynthorneiñ, lada ka um kan ryngngad na wah Myntdu baroh ki jingim kin duh.

Ka Myntdu Pynthorneiñ Farmers Welfare & Producer Organisation kala kyrpad ruh iaka JHADC kaba dei ka nongiada iaka khyndew ka shyiap bad ki um ki wah ban pyntreika iaka hukum jong ka NGT ha ki bynta jong ka Wah Myntdu ban iada iaki nongrep kumjuh iaki um ki wah bad ka sawdong sawkun ka mariang.