Sdang ki nongtrei ASHA ia ka jingiakhih da kaba shong jahthait

Syllad | The Rising MeghalayaOctober 31, 2023

Ka Meghalaya ASHA Workers’ Union (MASHAWU) haka sngi Nyngkong ka la shim ia ka rai ban pynlong da ka jingiakhih da kaba shong jahthait ha la ki jong ki iing ki sem tad haduh ba ka sorkar jylla ka long lakloi ban pynurlong ia ki jingdawa ba sahteng jong ki.

Ia kane ka rai la pynbna hadien ka jingiakynduh ia ka Myntri ka Tnat ka Koit ka Khiah ka sorkar Jylla ka Kong Ampareen Lyngdoh.

Haba kren sha ki lad pathai khubor, ka President ka MASHAWU ka Kong Mirajune Myrsing ka la ong ba na ka liang ka Myntri ka Tnat ka koit ka khiah ka la pynthikna ban shimkhia halor kane ka jingdawa ka jong ki na ka bynta ban kyntiew ia ka jingsiew ne ka honorarium bad u Myntri Rangbah ka jylla ha ka 6 tarik u Naiwieng 2023.

“Kumta ruh ngi la shim ia ka rai ban shongthait katba ngi dang ap ia ka jingmih na kane ka jingialang hapdeng u Myntri Rangbah bad kane ka Myntri ka Tnat ka koit ka khiah ka ban long ha katei ka tarik. Lada ka jingmih kam long kaba pynhun, ngin sa shim biang ia kiwei pat ki sienjam jong ka jingiakhih,” ong ka Kong Myrsing.

Na ka liang ka Adviser jong ka Meghalaya ASHA Workers Union ka Kong Sony Kharjana kala ong ba ki la pynpaw ruh sha ka Myntri sorkar ha kaba iadei bad kiwei pat ki jingeh jong ki nongtrei ASHA kaba kynthup ia ka jingkdup kaba 100% ki jingmyntoi halor ka koit ka khiah lyngba ka MHIS policy khnang ban khanglad ha kaba iadei bad ka jingshah wengkam ba khlem nongrim jong ki nongtrei ASHA ha ki nongialam shnong. Ka la ong ruh ba ki nongialam shnong, kata kum ki Rangbah Shnong kim donbor ban weng kam kynsan ia ki ASHA.

Ha kajuh ka por ka Kong Mira June ka  pynpaw ruh ka jingsngewnguh ia ka Myntri kaba la shimkhia ia ka jingdawa ha kaba iadei bad ka jingioh jingsumar ba 100% jong ki nongtrei ASHA ha ka jylla lyngba ka MHIS.

“Na ka liang ka Myntri ka la pynpaw shai ba na ka liang ka Tnat kam lah ban pyntreikam lyngba ki kyndon ain, hynrei ka pynthikna halor ki sienjam lyngba baroh ki DC bad ki Rangbah Shnong ha kaba iadei bad ka jingshngain jong ka kam ki nongtrei ASHA,” ong shuh shuh ka Kong Kharjana.