Sdang ki nongtrei JHADC sa da ka jingdeng lama ïong bym ioh tulop

Syllad | The Rising MeghalayaAugust 5, 2020

Ki nongtrei jong ka Jaintia Hills Autonomous District Council (JHADC) hapoh ka lama JHADC-Staff Association ki la sdang sa da ka jingdeng lama iong ban pynpaw ia ka jingsngewkut lad halor jong ka jingbym ïoh tulop kaba la Phra bnai kynthih.

Haba iakren bad u President jong ka JHADC-Staff Association u Ma Johnson Pohrmen ula iathuh, ba ïa kane rai deng lama ïong la shim haka jingshong jingïalang kaba pynlong hadien ka dorbar lyiur jong ka JHADC kaba dang shu dep shen.

“Kane ka lama ïong ngin deng haba ngi leit trei ba kan long kum ka jingpynbor ïaka Executive Committee jong ka JHADC kaba ïalam da u Ma Thombor Shiwat bad ruh ka sorkar Jylla halor ka jingduh tulop jong ngi kumjuh ka arear kaba ngi dei ban ïoh”.

Ula iathuh ba kane ka jingdeng lama ïong kan bteng katba kim pat ïoh ïaka tulop kaba sah mynta la Phra bnai.

“Wat lada ka konsil kam lah ban siew lut iaka tulop kaba sah 8 bnai, hynrei ngi dawa ba kan siew noh shwa tang 3 ne 4 bnai namar kumba long mynta ka la buh ïa ngi haka jingeh kaba khraw ban pynbiang ïaka jingdonkam jong ngi bad bun ki nongtrei ki la hap ban kit ram ban pyndap pynbiang iaka jingdonkam ha iing ha sem”, la ong u President.