Sdang ki sengbhalang ban pynrung dkhot da ki kynthei

Syllad | The Rising MeghalayaJanuary 8, 2021

Hadien ka Khasi Students’ Union (KSU), Jaintia Students’ Movement (JSM), Federation of Khasi Jaintia and Garo Peoples (FKJGP) bad kiwei kiwei, mynta sa ka Jaintia Students Union (JSU) kila sdang ban ithuh iaki jingkyrpang ki kynthei bad ban pynrung iaki kum ki dkhot bad nongialam hapoh ka kynhun jong ki.

Baroh shi katta kiba bun hi ki sengbhalang (pressure groups) la thaw tang da ki shynrang, hynrei mynta ki kynthei ruh kila sdang ioh ka lad ban long ki dkhot ha kine ki sengbhalang ne ki seng kiba pynbor iaka sorkar ha kino kino ki mat kiba iadei bad ka imlang ka sahlang.

Hynnin ka sngi Palei ka JSU kala thaw iaka tnad jong ka kaba la tip kum ka Girls’ Wing Mynso Unit ha ka jingialang kaba la pynlong ha Community Hall Mynso-A kaba ba la pynïaid da u Neil Mukhim Assistant General Secreatary JSU.

Ki don palat 20 ngut ki kynthei kiba la shim iaka jingkular ban trei kum ki dkhot jong ka JSU na kane ka tnad bad kine ki kynthup iaka President Dalapynhun War, Vice President Heiyo Rymbai, General Secretary Sukmon Lyngdoh, Assistant Secretary Salbina Syntem, Finance Secretary Halenmary Phai, Organising Secretary Ibadamut Syntem, Sport Secretary -Babynta Phai, Publicity Secretary Nidaka Syntem, Art and Culture Secretary Ribel Syntem, Descipline Secretary Siberka Sungoh, Education Secretary Hakani Tamki Lyngkot nalor ki 4 ngut ki dkhot ka EC.

U Jersom Shylla president JSU central body, ula ong hapoh ka seng la donkam shisha ban don ki kynthei namar bun ki khep ha ka jingiadei bad ka jingshah lehbein ki kynthei khynnah dei ka bynta jong ki kynthei ban mihshakhmat ban iasaid na ka bynta jong ki la ha khmat ka aiñ ne ha kino kino ki bynta kiba ki shynrang kim ioh lad.

“Ki khynthei ki long kum ki rishot jong ka iing bad kumba long mynta la don ki jingjia bapher bapher ia ki khynnah kynthei hapoh ka imlang sahlang kumta ka donkam bha ia ki kynthei ban long kum ki nongialam na ka bynta ban iada ia ka jingshahleh bein jong ki kynthei,” la ong general secretary JSU u Treiborlang Suchen.

Ka JSU ha kane ka jingialang kala buh ka thong ban pynrung dkhot shuh shuh iaki kynthei ha manla ki jaka khnang ba ki kynthei ruh kin ioh ka lad ban pynpaw iaka sur ka jong ki ha kino kino ki mat haka imlang ka sahlang.

Ha kane ka jingpynrung dkhot ka JSU la donlang ruh Treki Mukhim Finance Secretary, Waheh Shnong Mynso u A Sungoh ki dkhot jong ka JSU na ki Unit bapher bapher ba kiwei de kiba shah khot sngewbha sha kane ka jingrung dkhot.