Sdang ki skul SSA ban pyndep ïaki prokram Fit India Movement 2021

Syllad | The Rising MeghalayaApril 2, 2021

Ka Fit India Movement kaba dei kawei na ki thong treikam ka Sorkar India kaba la sdang naduh ka 29 tarik August 2019 ban khring bad pynlong ia ki nongshong shnong ka Ri kiba ïoh ïa ka met ka phad, ka pyrkhat pyrdain bad ka spah mynsiem kaba koit bakhiah.

Ha une u snem ka sorkar India kala buh thong kyrpang na ka bynta ki khynnah skul da kaba shna ïa ki prokram bapher ba la tip kum ka Monthly Wise Calendar Fit India Movement in School 2021 ka ba la sdang naduh u February (Rymphang) bad kut haduh u bnai December (Nohprah) 2021.  

Kumta haka thong jong kane ka prokram la sakhi ba ha West Jaintia Hills District ki skul SSA ha ki katto katne ki shnong  kila shimkhia ban pyndep ia ki  prokram kiba iadei bad u bnai February (Rymphang) ba la tip kum ka Magical Monday ha kaba ki khynnah skul ki iashimbynta da kaba leh ia ki Profile Writing bad ki Traditional Sports bad ha une u bnai March pat ki la iashimbynta ban pyndep ia ka  Mental Health Fitness Week da kaba leh ia ki jait jingialehkai ban ai jingbam bad pynkhlain ia ka bor jabieng.