Sdang noh ka iew ar sien shi taiew ha Wahiajer

Syllad | The Rising MeghalayaNovember 10, 2019

JOWAI: Ka Market Managing Committee, Wahiajer (lawpynsiñ- law Pyngkat) hadien ba kala ioh ka jingmynjur na ka Jaiñtia Hills Autonomous District Council (JHADC) ban pynlong iew ar sien shitaiew ha iew Pynsin, Wahiajer kala rai ban sdang noh mynta hi u bnai Naiwieng.

Kane ka iew ar sien shitatiew kadei haka iew Pynsiñ bad iew Pyngkat.

Ka JHADC katkum kyndon aiñ  Jaintia-Hills Autonomous District Council (Managing and control of Markets) Regulation 1975 hadien ka jingkyrpad jong ka shnong Wahiajer ban pynlong iew ar sien shitaiew ha iew Wahiajer kala ai ka jingmynjur ban pynlong ïa kane ka iew arsien shitaiew ban kyntiew ïaka ioh ka kot ki nongkhaii, ki nongrep kiba wan die ïaki mar rep bapher bapher ha kane ka iew.

Kane ka ka iew ka hap hapoh ka jingpeit jong ka Wahiajer bad ka heh haduh 4.91 acre.

U Chairman bad Secretary jong ka Market Managing Committee, Wahiajer u ma Kmen Shylla bad u ma W Phawa kila pynbna paidbah ba ïa kane ka iew arsien shi taiew yn sdang noh naduh 20 tarik u bnai Naiwieng (November), ka taiew balai jong une u bnai haka por 11 baje mynstep bad la kyrpad ia baroh ki nongwan iew bad ki nongdie nongthied ban wan naduh ba sdang kumba ki ju wan haka iew Pynsiñ.

Ha kine ki ar tylli ki sngi iew lada ki hap Sngi U Blei, yn pynkynriah shadien haka sngi iew Pynsiñ haka Khyllaw bad ka Pyngkat haka Muchai.

Ïa kane ka iew yn plie bad buh maw nongrim da u Myntri jong ka tnad Transport, uba long ruh u MLA ka thain u ma Sniawbhalang Dhar haka jingiadonlang u Chief Executive Member jong ka Jaiñtia Hills Autonomous District Council (JHADC) u Ma Thombor Shiwat, Dolloi bad kiwei kiwei ki riew rangbah ka thain.

Ka Dorbar Shnong Wahiajer ka kyrmen ba ka jingpynlong iew arsien shitaiew ha kane ka iew Wahiajer kan long ka jingkyrkhu ïaki nongrep, ki nongkhaii bad ki nongthied nongpet ka rilum Jaiñtia ban kyntiew ïaka ioh ka kot jong ki nongshong shnong.