Sdang nyngkong ka DS Loomkyrwiang iaka Bamphalar da ka drama ‘Nasib da Bynta’

Syllad | The Rising MeghalayaApril 27, 2025

Ka Bamphalar kadei kawei na ki rukom dustur ba la leh bad pyndep ha Jowai da ki katto katne tylli ki dong ki shnat shwa ban rep ban riang shaki hali ki pynthor.

Kumta ha une u snem ka Loomkyrwiang Dorbar Shnong haka jingpyniaid ka Bamphalar Committee kadei kawei na ki dong ki shnat ba pyndep nyngkong iaka Bamphalar jong une u snem da kaba pynlong iaka jingialehkai drama kaba ai kyrteng ‘Nasib da bynta’.

Iaka Bamphalar la pynlong ha Iungwalieh haka 25 tarik Iaiong katba haka sngi ba bud la pynlong ka jingiabam doh sngewbha da baroh ki khun kumba la hikai u mynbarim.

U Waheh shnong Ma Lammat-OO Laloo haba pyniaid iaka jingialang ula kynmaw tympang iaki riew rangbah, ki longkmie longkpa kiba ju sngewtynnad ban iashim bynta haki jingialehkai drama bad ha kata ka por ka Loomkyrwiang kadei kawei na ki dong ba bna nam kaba don iaki riew donsap la haka thoh drama, thoh sur, ki nongrwai bad nongput nongtem.

Da ka jingsngewkhia iaka jinglong kyrpang jong kane ka rukom dustur, u Ma Lammat ula kyntu iaki khun samla ka shnong ban shimkhia ban bud pateng khnang ba kane ka rukom dustur kan neh kan sah teng la pateng.

Ka Dorbar shnong kum ka jingpynsah kynmaw ia kane ka Bamphalar 2025, kala pyllait paidbah ruh iaka Riti treikam jong ka Dorbar shnong kaba la dep pynjanai iaki ain ki kyndon daki dkhot jong ka Constitution Committee bad ia kane ka riti treikam la pyllait da u MDC JHADC Ma Awhai Andrew Shullai.

U Andrew Shullai haka jingkren ula iaroh iaka dorbar shnong Loomkyrwiang kaba la kitkhia ban pynneh pynsah iaki jinghikai u longshwa manshwa.

Iaka jingialang la pynwai da ki kyntien khublei na u Ma Arkiru Laloo, Secretary Bamphalar katba u Ma Sophilos Lywait ula ai ka nguh ka dem.