Sdang Sports Meet ka ICYM ha Kiang Nangbah Stadium

Syllad | The Rising MeghalayaOctober 15, 2021

Ka Indian Catholic Youth Movement (ICYM), Jowai Diocese kala sdang ïaka Annual Sports Meet 2021 ha Kiang Nangbah Stadium, Jowai haka sngi Thohdieng.

Kane ka sports meet kan kut lashai ka sngi la wan ban iashimbynta da ki 18 tylli ki Parish kiba hap hapoh ka jingpeit jingkhmih jong ka Jowai Diocese. Ki jingialehkai ha kane ka meet ki kynthup iaka Football, Basket Ball, High jump, Long jump bad jingïakop mareh ha ki kyrdan bapher.

U MLA Jowai, Wailadmiki Shylla ula plie paidbah ia kane ka meet haka jingïadonlang u MDC Mynsngat Khanduli u Dawan Lyngdoh, u Hony. General Secretary WJDSA u ma Lammat O Laloo bad kiwei kiwei.

U Wailadmiki Shylla haba kren kum u kongsan ula ong ba ka Meghalaya Youth Policy 2021 la thaw ia ka na ka bynta ban kyntiew ïaki samla kiba don ka sap ka phong naduh ka rta kaba 5 snem haduh 29 snem. Ula ïathuh ba hapoh ka Meghalaya Youth Policy ka sorkar Jylla ka la pynrung ïa baroh ki tnad sorkar kiba ïadei bad ki khynnah samla kynthup naduh ka pule puthi, ka koit ka khiah, Skilled Development ne ban ai jinghikai pyntbit ïa baroh ki samla, Entrepreneurship, Art & Culture bad kiwei kiwei.

Ula ong ba ka Meghalaya Youth Policy la pynrung iaka ‘Coupon system’ ha kaba yn don ki nonghikai ba tbit bad yn sa ai ka jingïarap pisa sha ki khnang ba kin ai ka jinghikai ban pyntbit shuh shuh ïa ki samla jong ki district bapher bapher ha ka jylla.

Ïaka jingïalang plie ia kane ka meet la pynïaid da u Mutshwa Thabah President ICYM, Jowai Diocese bad la ïoh ka jingduwai na u Phadar Manbha Pakem, ki kyntien pdiang burom na u Bhabok Sungoh bad ki kyntien khublei na u Secretary ICYM u Emansing Sympli.