Sdang u MDC Mynsngat Khanduli da ka skul ban pynioh jingstad iaki khynnah kiba wan na ki longïing ba duk

Syllad | The Rising MeghalayaFebruary 21, 2022

Kum ka dak ban pynsahnam iala u jong u kpa (L) Dominic War bad ban sam jingnang jingstad sha ki khynnah kiba wan na ki longïing kiba duk, u MDC jong ka Mynsngat Khanduli Dawan Lyngdoh ula sdang da ka skul phareng haka shnong Namdong A, West Jaintia Hills bad mynta ka sngi la plie paidbah ruh iaka ïing skul jong kane ka skul.

Ia kane ka skul la tip kum ka Dominic English School bad la sdang ia ka naduh u Rymphang 17 tarik jong u snem 2021. Kane ka skul ka don haduh klas V.

Ha ka jingplie paidbah ia kane ka skul la iadonlang ki waheh shnong ka shnong Namdong A bad Namdong B kiba kynthup ia u Ma DS War, Ma Arki Sumer, u principal ka Krist Syiem Sec. School Namdong Rev. Fr. Dominic, ki nonghikai bad ki kmie ki kpa jong ki khynnah skul nalor kiba haiing jong u ma Dawan Lyngdoh.

U Ma Dawan Lyngdoh haba plie ia kane ka skul ula ong ba ka jingthmu ban seng ia kane ka skul ka long ban pynioh jingnang jingstad ia ki khynnah jong ka thain Namdong kiba wan na ki longiing kiba duk ba kyrduh bad kiba ym ioh ka lad ban pule sha ki skul kiba shabar naka shnong.

Ula ong shuh shuh ba ka thong jong ka skul ka long ban sam iaka jingnang jingstad kaba bha tam sha ki khynnah skul kaba iadei bad ka juk kaba mynta bad ban pynneh iaka nam ka burom u kpa jong u bad iaka shnong Namdong.