Sei iaka kaiphod ‘original’ halor ka jingsiat iap ia u  (L) Cheristerfield Thangkhiew ong ka Sur Ki Nong Jaiñtia iaka sorkar

Syllad | The Rising MeghalayaSeptember 14, 2022

Ka jingbitar bad ka jingpyrshah iaka iaka sorkar halor ka kaiphod jingshah siat iap u nongialam barim ka Hynniewtrep National Liberation Council (HNLC) (L) Cheristerfield Thangkhiew kaba la jia haka 13 tarik u Nailar 2021 kala pur sha rilum Jaintia.

Haka sngi ba ar ka ka Sur Ki Nong Jaiñtia ha ryngkat ka Ka Sur Ka Bri U Hynniewtrep (KSKBUH) bad ki katto katne ki sengbhalang kila lum jingialang ha Iawmusiang, Jowai halor ka jingsuba ka don eiei shah lyndet halor ka jingshah siatiap u (L) Cheristerfield Thangkhiew bad dawa na ka sorkar ban sei madan iaka kaiphod ‘original’ ne ka report kaba nyngkong eh kaba la khlieh da u Justice (retd) T Vaiphei.

Ha kane ka jingialang la mih kawei ka sur na baroh ki nongkren bad katta kalong ba ka sorkar ka dei ban sei madan khlem pynslem shuh shuh ïaka original kaiphod jong u Justice (retd) T Vaiphei lym kumta la byrthen ban pynlong iaka jingiakhih paidbah.

U Myntri Rangbah ka Jylla Conrad K Sangma ula wanrah iaka kaiphod haka sngi Thohdieng ha iingdorbar. Katkum ka report u Justice (retd) T Vaiphei la ong ba ka jingleit kem ki pulit ia u nongialam barim ka HNLC ka dei kaba la leh thurmur, kaba leh khlem pyrkhat bad palat iaka bor kaba la wanrah iaka jingkhlad u Bah Che.

Baroh ki nongkren kynthup naduh ki nongïalam sengbhalang bapher bapher haduh ki nongïalam ka KSKBUH ki la ther tyngeh ïaka sorkar MDA kaba la buhrieh ïaka kyrteng jong kiba la donkti ban siat ïap ïa u General Secretary barim ka HNLC (L) Cherishterfield Thangkhiew.

“Ngim hun ïaka kaiphod kaba mih naka jingtohkit shah siat ïap u Bah Cherishterfield Thangkhiew bad ïa kane ka kaiphod lah ban shna da mano mano ruh bad ym donkam ban shimpor haduh shisnem”, la ong u Marshall Lyngdoh uwei na ki nongïalam KSKBUH uba la thang ruh ïaka kaiphod kum ka dak ka jingbym sngewhun ïaka.

U Bah Hamar Lyngkhoi Vice Chairman KSKBUH ula ong ba lada ka ktah ïaka shongsuk shongsaiñ haka Jylla, ka sorkar kadei ban shim ïaka jingkitkhkieh namar barabor dei ka sorkar kaba pynbor ïaki nongïalam ban ïaleh pyrshah bad leh ki kam beaiñ ruh hateng hateng namar dei ma ka (sorkar) kaba leh beaiñ nyngkong.

Ula ong ba kum ki nongïalam kim kwah shuh ban dang jia kum kine ki jia nangne shakhmat bad ka Sur ka Bri u Hynñiewtrep ka jingdawa jong ka, kadei kaba shonghok ïaka hok longbriew manbriew.

Ïaka jingïalang la pynïaid da u Leningstar Rymbai president JSM bad la ïoh ka jingkren na u Sambormi Lyngdoh, Jimraul Kharmuti bad kiwei kiwei.