Sei madan ka ECC ba donkti ki minister ka MDA ban pyniaid iaki kharkhana coke ha East Jaintia Hills | Nangno ki ioh dewiong?

Syllad | The Rising MeghalayaJuly 26, 2021

Ka Environment Co-ordination Committee (ECC), Elaka Sutnga haka sngi Nyngkong kala sei madan iaka jingdonkti ki myntri jong ka sorkar Meghalaya Democratic Alliance (MDA) ban pyniaid iaki kharkhana coke ne ki kharkhana saiñ rnga dewiong ha East Jaintia Hills District.

Ka Environment Co-ordination Committee (ECC), Elaka Sutnga kala dawa na ka bor synshar district ban khang shisyndon ia baroh ki kharkhana saiñ rnga dewiong beaiñ haka East Jaintia Hills, pynban na kaliang u Deputy Commissioner, East Jaintia Hills ula pynmih tang da ka jingpynbna haka 15 tarik u Naitung ba ki kharkhana ki bym pat ioh iaka certificate Consent to Operate (CTO) kim lah satia ban sdang pyntreikam iaki kharkhana ne ban pynmih ia u rnga dewiong haka district.

Phewse, kaba lyngngoh hadien kane ka jingpynbna u Deputy Commissioner, kine ki kharkhana kiba la kynnoh ba ki dei kiba beaiñ kila iaid shakhmat ban thang dewiong bad ka jingkylli kalong ba nangno ki ioh dewiong haba dang khang ka jingtih dewiong?

Ka ECC kala ong ba haka 22/07/2021 ki briew jong ka Meghalaya State Pollution Borad (Board) kila wan jurip ia kine ki kharkhana coke bad la lap pyllein pyllein da ki phew tylli ki kharkhana kila dep shna bad sain rnga dewiong.

Ka ECC kala ong ba kane ka jingthang dewiong kala ktah iaka haw haw bad ka koit ka khiah u briew, nalor ba kala ktah ruh um dih um bam kaba ki ioh na u slap namar ba ki tin sop iing jong ki briew kila iong tdem ne pui pui dewiong.

Pynbna u DC EJH ba tang ki kharkhana Coke kiba ioh CTO ki lah ban saiñ rnga dewiong

Katkum ka Air bad Water Act kino kino ki kharkhana ki dei ban ioh ia ka CTE na ka state pollution board ha shuwa ban pyntrei bad yn pynshitom ia ki pyntrei ia ki kharkhana khlem ki CTE, hynrei kin ap shuwa hato ka pollution kan bud ne em ia ki kyndon ka aiñ ha ka ban pynshitom ia ki trai coke kiba kala lap ba kim don iaka CTE bad CTO, ong u legal adviser ka ECC Ma Reading War.

Byrthen ka ECC ban ujor da ka PIL bad sha ka Human Rights Commission halor ki kharkhana Coke beaiñ

Ka jubab RTI kala pynkyndit iaka ECC namar ba don ki myntri sorkar ka MDA ba don bynta ha kane ka jingshna iaki kharkhana sain rnga dewiong bad don ruh ki trai shnong kiba iasylla ha kane ka kam, hynrei ki ioh nong tang khyndiat eh bad kaba tam la rah ki nongkhaii bar jylla. Bad ki don ruh ki trai muluk kiba die iaki NOC jong ki sha kiwei ki briew.

Shuh shuh ka NOC kaba ioh naka Single Window Agency ruh ka iapher ki kyrteng briew bad kim dei satia kiba ioh NOC naka Elaka.

Ka ECC kala pynpaw ka jingsngewdiaw bad ka jingsngewsih halor ka jingleh kuman ka sorkar ban pynsangeh ia kine ki kharkhana beaiñ bad pynrem ruh ia u myntri ka tnad kam khlaw James Sangma uba la klet iala ka kamram ka jong u ban iada iaka mariang bad ka koit ka khiah ki briew.

Ka ECC ka dang ap shuh shuh iaka jubab RTI na ka MSPCB bad hadien kane kan shim iaka sienjam kaba tyngeh ban iakhun ban pynsangeh shisyndon ia kine ki kharkhana beaiñ.