Sei madan ka HYC Diengiei ba pyntrei torti ia ka surok lyngba ka skhim Meghalaya Integrated Transport Project

Syllad | The Rising MeghalayaOctober 2, 2023

Ka seng Hynniewtrep Youths’ Council (HYC) Diengiei Circle  ha ryngkat ki nongkitkam ka HYC Krang unit ki la sei madan ha kaba iadei bad ka jingpyntrei torti ia ka surok lyngba ka skhim ba la tip kum ka Meghalaya Integrated Transport Project ba la bei tyngka da ka World Bank.

Kane ka la wan long ruh hadien ba ki nongialam jong ka seng HYC mynta ka sngi Nyngkong, ki la pynlong ka jingleit ban jurip ia kane surok naduh Mawmaram, Nongthliew, Mawmih Diengiei, Mawlyndep shaduh lad Umsaw bad lap ia ka jingtrei torti jong ka kompeni kaba pyntrei ia ka.

Lah ban pynkynmaw ba ka jingpyntrei ia kane ka surok ka sdang naduh u snem 2020-21 kaba don kumba 40 km ha ka jingmang tyngka kaba long kumba 64 klur.

Ka HYC lyngba une u kyrwoh ka la pynpaw ba ia katei ka surok la pyntrei da ka kompeni M/S Tanor Engineering Sunshine Sawkmie (JV), bad la lap ba ka jingpyntrei torti ia kane ka surok kalong kumba la saphriang ha ki video ha kaba iadei bad ka jingsiang rong torti ia kane ka surok kaba la ktah jur bad buh jingma ia ki paidbah jong ka thain Diengiei Area khamtam ia ki kali kiba iaid bad kiba kit ia ki mar rep.

Nalor kata ka Seng ka la ong ba kane ka ka jingpyntrei torti bad ka jingpynslem ia kane ka surok kala ktah jur ia ka koit ka khiah jong ki nongshong shnong lyngba u pum pum bad ka la wanrah ruh ka jingeh kaba khraw ia ki nongleit nongwan bad kaba buh jingma ruh na ki jingmynsaw ia ki nongleit nongwan.

Shuh shuh ka HYC ka la kynnoh ruh ba kane ka kompeni kaba pyntrei ia kane ka surok kam shym la bud satia ia ki kyndon ne quidlines kumba dei ban leh.

Kumta na ka liang ka seng HYC ka kyntu ruh ia u ia u MLA ka Sohiong Constituency u Bah Synshar Thabah ba un tuklar mardor ia kane ka kam khnang ba kan ym wanrah jingeh ia ki paidbah nongleit nongwan.