Sei pistol u Rollingson pyrshah iaki nongshong shnong ka Saipung

Syllad | The Rising MeghalayaJanuary 20, 2024

Ki nongialam jong ki kynhun seng bapher bapher kila mudui iaka jingujor ejahar pyrshah ia u Rollingson Dkhar uba na ka shnong Jalaphet, East Jaintia Hills District halor ka ki kam runar ruser, jingthombor bad ktah kti, dawa pisa, prung jubor haki iing briew, pynjot pynpra bad sei pistol iaki nongshong shnong ka Saipung.

Ia kane ka ejahar la mudui ryngkat lang da ka u Waheh Shnong Saipung, Secretary Saipung, President & Secretary VDP, President & Secretary of Biate Youth Association, President & Secretary of All India Baite Students Association ha u officer inchage Saipung Police Station Saipung, East Jaintia Hills District.

Katkum ka ejahar ba la ujor ha u Officer incharge Saipung Police Station, la ong ba haka 17 tarik Kyllalyngkot haka por kumba 4.30 baje janmiet khlem ka jingtip ki nongialam Shnong Saipung, u Rollingson Dkhar ryngkat ki paralok jong u, ki la wan haki 5 tylli ki kali bad pynthut iaka shongsuk shnongsain jong ki nongshong Shnong ka Saipung.

La kynnoh ba u Rollingson Dkhar bad ki paralok ki la ktah kti ia u Priceless Darnei haduh ba ula poi sha PHC na ka daw ka jingmynsaw na ka bynta ka khmat kaba donkam ban ioh jingsumar.

Nalorkata la kynnoh ruh ba kila rung jubor hapoh ka iing jong u Lalramzoma Nampui kumjuh ha kamra thiah bad lynthaw iaki mobile phone jong ki trai iing bad ktah kti ruh ia kawei ka longkmie kaba 50 snem rta bad ki khun jong ka kiba don haka rta 14 bad 16 snem.

Shuh shuh la kynnoh ba u Rollingson Dkhar ula sei iaka pistol bad u dawa pisa haduh 15 lak tyngka na u Lalromzoma Nampui, u Priceless Darnei, u Moia Ngirsim bad na u Ruaiia Darnei bad ula ai por ban siew hapoh 5 sngi lym kumta un biang bad siat iaki.

Ha kaba iadei bad kane ka jingjia haka 19 tarik Kyllalyngkot, ki spah ngut ki nongshong Shnong ka Saipung ki la pynlong ka jingiakhih paidbah ne Protest Rally da kaba rah iaki placard jingthoh pynrem bad dawa na ka bor jong ka ain ban shimkhia ban pynshitom ia une u briew katkum ki kyndon jong ka aiñ.

Ha kane ka jingiaid Rally la shim bynta naduh ki longkmie longkpa, ki samla shynrang kynthei kumjuh ki sengbhalang bad ki dawa ban kem bad pynshitom ia u Rollingson bad ki paralok jong u.