Seisoh ka jingiakop siat suloi ‘1st Inter-School Shooting Championship’ba la pynlong da ka SAM

Syllad | The Rising MeghalayaNovember 19, 2024

Ka jingpynlong ia ka jingiakop siat suloi ‘1st Inter-School Shooting Championship’ ha ka 16-17 tarik u Naiwieng da ka Shooting Association of Meghalaya (SAM) ryngkat ka jingiatreilang bad ka Laitkor Shooting Club, Airforce Station, Laitkor hapoh ka jingkhmih da ka National Rifle Association of India (NRAI), ka la kut da ka jingsam ia ki khusnam sha ki nongjop ha ka jingialang ba la pynlong hapoh Air Force Station, Laitkor, Shillong.

Kane jingïakop iasiat Air pistol bad Air rifle 10M kaba ar sngi kynthih ka la wanrah lang ïa ki 20 ngut ki khynnah samla skul kiba don sap na hynriew tylli ki skul. Ki nongïashim bynta ki la iakhun ha ka 10M Air Rifle bad 10M Air Pistol, bad pyni shibun ki sap kiba phylla lyngba ka jingtrei shitom, bad ka jingminot ka jong ki.

Haba kren ha ka jingïalang u Wing Commodore u la pdiang sngewbha ïa ki nongïashim bynta kumjuh ia ki kmie ki kpa, bad ki nongialam na ka Shooting Association of Meghalaya (SAM), bad pynpaw ba ka Laitkor Shooting Club ka kloi ban ïatreilang bad SAM-NRAI ban pynlong ïa ki jingïalehkai kiba ai jingmyntoi ïa ki samla ka jylla Meghalaya. U la pynpaw ruh ka jingkmen ban ïohi ïa kiba bun ki nongïashim bynta ha kane ka jingiakop kaba la pynlong ha ka sien kaba nyngkong.

U President ka Shooting Association of Meghalaya bad Vice President ka National Rifle Association of India, u Bah John F. Kharshiing, u la ong, “Kane ka jingïalehkai kam dei tang ka jingïakop hynrei ka jingrakhe ïa ka sap bad ka jingtrei shitom. Ka thong jong ngi ka long ban pynshlur bad thaw lad ïa ki nongsiat suloi ban poi sha ki kyrdan ha ka National bad ha International.”

U President ka SAM u la ai khublei kyrpang ïa ki heh ka Air Force Station, Laitkor halor ka jingïarap kaba khlain bad ai lad ba kane ka jingïakop kan long kaba jop, bad pynpaw ka jingkyrmen ba kane ka jingïatreilang kan nangkiew ban pynmih ïa ki nongialehkai siat suloi na Meghalaya sha ka kyrdan kaba heh.

U la pynkynmaw ba kane kan iarap ruh ia ki samla ban pynkhreh ialade ha kaba ia dei bad ka ‘6th Meghalaya Games’ ka ban sa long naduh ka 20 -25 tarik u Kyllalyngkot 2025. U la ai khublei ia ki kmie kpa kiba la pynshlur ia ki khun ban wan shakhmat ha kane ka jingialehkai sports bad u ong ba mynta ki don sa ki ki lad jingiarap kaba ki nongjop medal ki ioh lyngba ka cash award bad ka sports scholarship, bad u la kyntu ia ki samla kumjuh ki kmie kpa ban pule ia ka ‘Meghalaya Sports Policy 2019’ kaba la don bad ia kaba ka MSOA mynta ka dang ai jingmut shuh shuh ban pynbha ia katei ka policy. U kyrmen ruh ba lyngba ka jing kyrshan borbah jong ka Sorkar Meghalaya shen kin sa mih ki sap kyrpang ha ki Olympic Sports ki ban sa poi sha ka kyrdan National bad International.

U Bah Neil Sootinck, General Secretary, ha kaba ai khublei na ka bynta baroh u la pynpaw ba shibun ki samla bad ki skul ki la pynpaw ïa ka jingkwah ban ïashim bynta ha kane ka jingïalehkai. U la ong ruh ba namar ba kane ka dei ka sien nyngkong ban pynlong ïa kane ka jingïakop, kumta ruh ha ki jingiakop ia siat kiban sa wan na ka liang ka SAM kin pynlong ïa kane ha ka por lyiur lane por tlang bad ha ki shuti skul ban pynshlur shuh shuh ïa ka khynnah samla skul ban iashim bynta.

Ka jingïalang ka la kut da ka jingai khusnam ïa ki nongjop da u Wing Commodore bad u President ka Shooting Association of Meghalaya.

Result 1st Meghalaya Inter School Shooting Championship

.177 Peep Sight Air Rifle Nr
Sub Youth Women
1. Kopal Dubey – Gold, APS School
2. Surbhi Singh- Silver, APS School

Sub Youth Men
1. Abhimanyu- Gold, APS School
2. H Susaanth Lal- Silver, APS School
3. Dhanistha Thakuria- Bronze, APS School

Youth Women
1. Syesha O Hek- Gold, APS School

Youth Men
1. Mayank Vats- Gold, APS School
2. ⁠1. Mannat Yadav- Silver, APS School
3. ⁠Ishaan Sharma- Bronze, APS School

.177 Air Pistol Nr
Sub Youth Women
1. Lalgouhao Singson – Gold, Mizo High School

Youth Women
1. Da-I- Labynta Ryntathiang- Gold, St John Whitehall

Youth Men
1. Lamphang M Allya- Gold, Government Boys Higher Secondary School