Seisoh ka jingsumar ba kham niar ki doktor ka NEIGRIHMS halor ka jingpang ba phylla

Syllad | The Rising MeghalayaAugust 18, 2023

Ki doktor hapoh ka North Eastern Indira Gandhi Regional Institute of Health and Medical Sciences (NEIGRIHMS) ha ka sien kaba nyngkong ha ka jylla bad lehse ha ka thain shatei lammihngi (Northeast) ki la lah ban leh ia ka jingsumar kaba kham niar na ka bynta u nongpang uba ioh ia ka jingshitom ba phylla ha ki tor.

Une u nongpang uba dang samla u la ioh ia ka jingshitom kaba jur kaba ktah ia ka jingring bad pynhiar mynsiem mynta lah phra bnai kynthih.Une u samla ula leit ruh ban shah sumar shabar ka jylla halor kane ka jingshitom, hynrei kam shym la iarap satia.

Hadien une u nongpang u la wan shapoh NEIGRIHMS ha kaba la jurip bniah da ka kynhun ki doktor na ka Department of Tuberculosis bad Respiratory Diseases, NEIGRIHMS hapoh ka jingialam u Dr. Vijay Noel Nongpiur, Assistant Professor, Dr John Muchahary, Senior Resident bad u Dr Gideon Thangkhiew, Junior Resident.

Hadien ka jingwad bniah la shem ba une u nongpang u la ioh ia ka jait jingshitom kaba kham niar ia kaba la tip kum ka Pulmonary Alveolar Proteinosis. Kane ka jait jingpang ka dei kaba kham pher bad kaba ju jia tang kumba 6.87 na ki shi million ki nongshong shnong.

Ka jingsumar ia kane ka jingpang Pulmonary Alveolar Proteinosis ka kynthup halor ki rukom aijingsumar ba la tip kum ka Whole Lung Lavage, ha kaba la pyndap ia ki tor baroh da ka saline bad hadien ka jingpynkhuid ban weng ia ka jingmih bun jong ka khlein.

Ha kane ka jingsumar la pyndonkam haduh kumba 7 litar ka saline ban pynkhuid ia uwei uwei u tor.Hadien kane ka jingseisoh ha ka jingsumar, une u nongpang u la pyni ia ka dak ioh bor ha ka jingdon ka oxygen jong u, bad hadien ba u la ioh ia ka jingkoit kaba pura la pyllait noh ia u.

Ia kane ka jingsumar kaba seisoh la iashim bynta da ka kynhun ki doktor bad ki  technical staff na ka Departments Tuberculosis and Respiratory Diseases, Anaesthesia bad  CTVS OT. “Ka Dr. Priyanka Dev, Associate Professor bad Dr. Dasara Nongbet, Senior Resident bad ka kynhun jong ki na ka Department of Anaesthesiology bad u Dr. Reuben Kynta, Associate Professor, Department of CTVS.