Seisoh ka jingsumar ba nyngkong ka Shillong Civil Hospital iaka jingpang bampong na pdot sha snier lyngba ka VATS Esophagectomy

Syllad | The Rising MeghalayaSeptember 6, 2023

Ha kawei na ki jingjop kaba khraw ha kaba iadei bad ki lad aijingsumar, ka kynhun ki doktor hapoh Shillong Civil Hospital dang shen ki la pyndep ia ka jingsumar ne surgery kaba nyngkong eh ba la tip kum ka Key Hole (Video Assisted Thorascopic – VATS) Esophagectomy na ka bynta u nongpang bampong (Esophageal Cancer).

Kane ka jingsumar ka la long kaba seisoh kaba la pynlong ia u nongpang ba un ioh ia ka jingkoit kaba pura tad haduh ban da pyllait noh napoh ka hospital.

Lah ban kdew ha kane ka jait jingpang bampong Esophageal Cancer- ka jingpang bampong u pdot bad kaba pynshitom ia u briew ba ngat iaka jingpang shaduh snier, ka dei kaba kynrei bha ha Meghalaya, ha kaba kane ka jylla ka dei kaba sakhi ia ka jingdon bun eh kiba ioh ia kane ka jait jingpang bampong hapoh ka ri baroh kawei.

Ha ka jingshisha kane ka rukom puid barim, kata ka jingweng noh ia u pipe rung bam ka dei kaba ju leh da kaba hap ban ot kham heh na ki bynta jong ka shadem kaba wanrah ka jingpang kaba jur bad ka jingpor slem ban ioh koit.

Na ka liang u Dr. Cliff Wanniang ha ryngkat ka kynhun jong u, nalor ka jingiarap na u Dr. Caleb Harris, Additional Professor, Surgical Oncology, NEIGRIHMS bad u Dr. Newstar Syiemiong, Anaesthetist, Ganesh Das Hospital lem bad ka kynhun ki Anaesthesia napoh Civil Hospital, Shillong, i Dr. H. Majaw bad  Dr. M. Surong ki la lah ban pynlong ia kane ka jingpuid kaba seisoh lyngba ka jingot kaba tang khyndiat eh da kaba pyndonkam da ki tiar kiba kyrpang.

Seisoh ka jingsumar ba kham niar ki doktor ka NEIGRIHMS halor ka jingpang ba phylla

Une u nongpang u dei uba la ngat ha ka Stage 3 tumour bad hap ban shna hadien ba la pyndep laisien ia ka chemotherapy. Ia baroh u pipe rung bam ne esophagus la weng noh ha kaba la hap ban pyndait bad thep da u tube ha ka jaka jong u esophagus.

Ia mynta hi ia kaba kum kane ka jingshna ne surgery la leh tang ha ki khyndiat eh ki jaka sumar ha ka thain shatei lammihngi jong ka ri India (Northeast), kata kum ha NEIGRIHMS bad katto katne ki jaka kiba don ia ki intensive Intra-Operative and Post Operative care.

Hynrei la lah ban pynurlong ia kane ka jingsumar hapoh Civil Hospital Shillong hadien ba kane ka hospital ka la pynbit pynbiang da ki tiar ki tar aijingsumar bathymmai na ka bynta ban sumar ia ki jait jingshitom kiba shem shitom bad ruh hadein ka jingiateh MoU bad ka NEIGRIHMS da u Mission Director, NHM ha ka jingiatreilang bad ka Cancer Care.

Jop ka Woodland WK Hospital ban sumar ia i khyllung ba ioh iaka jingpang ba kham niar