Seisoh ka prokram aijinghikai pyntbit ka DDUCC ha ka kam “Makeup & Hairstyling” ha Wahiajer

Syllad | The Rising MeghalayaDecember 16, 2024

Ka prokram aijinghikai ba hynriew sngi kynthih ba la khot pynlong da ka Deen Dayal Upadhyay Community College (DDUCC) ha kaba iadei bad ka kam “Makeup & Hairstyling” na ka bynta ki samla kynthei kaba la sdang naduh ka 9 haduh ka 14 tarik Nohprah ha ka shnong Wahiajer ka la long kaba jop bad seisoh.

Ka jingthmu jong ka prokram ka long ban ai ia ki jingtip ba kham pher bad kiba thymmai tam halor ki rukom pyntah pynsleh pynbhabriew durkhmat bad ka jingpynitynnad bad pynwandur ia u shniuh khlieh ha ki rukom bapher bapher.

Ia kane ka prokram la plie da u Prof. H. Lamin (Retd) uba long ruh u Founder Principal I/c, DDUCC, Wahiajer kum u Kongsan bad uba la pynpaw bad ka thong bad jingthmu ba kongsan jong ka DDUCC ka long ban pynkupbor ïa ki paidbah da ki jait jingtbit bapher bapher kum shi bynta jong ka Policy Pule Puthi jong ka Ri (NEP 2020).

Katba ha ka sngi kut la ia don lang u Bah Teiborlang Pathaw, (MDC) EM ka KHADC kum u Kongsan ha ryngkat ka jingiadon lang u Dr. F.R. Sumer, Librarian, NEHU kum u symbud kongsan, Bah Maurice Lyngdoh, nonghikai barim ka Sacred Heart Hr. Sec. Boys School, Mawlai, Shillong, Bah Rimis Pyrtuh, dkhot ka Dorbar Shnong Wahiajer bad kiwei kiwei.

U Kongsan ha ka jingkren u la ai mynsiem ia ki nongiashim bynta bad kitbok kitrwiang ba ka lawei jong kine ki samla kynthei kiba la ioh ia kane jinghikai pyntbit kan long kaba seisoh bad kan iarap ruh ym tang ia ki shimet hynrei ia ka shnong ka thaw bad ia ka thain hi baroh kawei.

Katba u Bah Rimis Pyrtus u la ban jur ba baroh shilynter ka imlang sahlang jong ka Shnong Wahiajer ka la ïohi ïa ki jingnoh synñiang kiba kongsan da ka NEHU hapoh ka jingïalam jong u Prof P.S. Shukla, u Vice-Chancellor ba donburom jong ka NEHU bad Ka Prof S.M. Sungoh, kum ka Principal I/c jong ka DDUCC’s. Kum ka skulbah ka pyni ia ka jingthmu ban kyntiew ia ka jingstad bad jingpynwandur jong ki samla lyngba ki prokram pynroi sap bapher bapher.

Kane ka jingïalang ka la khring ïa kiba bun ki samla kynthei kiba khmih lynti ruh kum ka lad ban wad ïa ki sap jong ki ha ka kam  pynbhabriew bad shna pynwandur ia u shniuh khlieh. Ki nongiashim bynta ki la ioh jingmyntoi shibun na ki riew shemphang kiba la ai ia ki jinghikai bapher bapher ha kane ka bynta kaba ai ruh ia ka jingkyrmen ha ka liang ka seng kam seng jam.

La pynkynmaw ba ha u snem 2023-24, ka DDUCC, Wahiajer ka la pynlong haduh 21 tylli ki prokram pynroi sap kiba la ioh ia ka jingkynthoh kaba bha na ki paidbah ha katei ka thain. Ia ka jingpyrkhat jong ka imlang sahlang la iasam sha ki nongsngap katba ki dang khmih lynti ia ki kam kiba ka kolej kan sa pynurlong ha ki snem ban wan da kaba pynleit jingmut ha ki prokram ai jinghikai ia ki sap kiba donkam ban iarap ia ki briew shimet kiba donkam ban kamai jakpoh wat hapdeng ki jingeh kiba ki iakynduh bad ka ai ruh ia ki lad ki lynti ia ki samla ban long kiba la pynkhreh da ki sap ki phong ha ki kam bapher bapher.