Set byndi shi jingim ia u Tellme, I Love You, Sampher & Ramesh ki suba donkti ban pyniap iaki ar ngut ki nongniah kali kamai

Syllad | The Rising MeghalayaSeptember 1, 2022

Kumba 400 ngut ki paidbah kiba kynthup ïaki nongïalam sengbhalang bapher bapher, ki nongñiah kali kamai tourist lem bad kiba haïing hasem u (L) Fullmoon Kharsahnoh bad (L) Damehipaia Papeng kiba shah pyniap ha ki riew thrang snam kila ïamih paidbah haka peace rally kaba long haka sngi Palei ban dawa na ka sorkar Jylla ba kadei ban pynthikna ba ki riew thrang snam kiba la pynïap dusmon ïa kine ki arngut kiba niah kali kamai ka dei ban sdien phasi lane ban set byndi baroh shi jingim.

Ia kane ka peace rally la pynlong da ka All Jaintia Commercial Vehicle Association (AJCVA) kaba la snohktilang da ka Synjuk ki Waheh Shnong Ri Jaintia, Synjuk Waheh Shnong Jowai, Jowai-Shillong-Guwahati Tourist Cab Association, JLKTTA nalor ki sengbhalang bad ki riew paidbah. Kane ka rally kala sdang na Iawmusiang bad la pynkut ha Lad College, Lad Nartiang, Jowai.

Ki paidbah kila mih sha surok ryngkat bad ki jingthoh pynrem haki placard bad ka jingpyrta shla ban dawa na sorkar bad ka bor jong ka aiñ ban sdein phasi ne set phatok shi jingim ia kine ki suba kiba kynthup ia u I Love You Talang, u Ramesh Dkhar, Tellme ba tip ruh kum u Bor Pyrtuh bad Sampher Ksoo kiba la phla ha ki pulit ba ki donkti ban pyniap ia kine ki ar ngut.

Lah ban pynkynmaw hangne ba u Damehipaïa Papeng udei na ka shnong Khonshnong katba u Fullmoon Kharsahnoh udei na ka shnong Larnai la suba ba kila shah pyniap ha kine ki saw ngut ha ki ar jaka.

U Damehipaïa Papeng uba niah kali na Jowai Ladrymbai ula jah na ïing naduh ka 10 tarik Nailar bad ïaka met jong u la lap haka 24 tarik Nailar kaba la bret ha khlaw hajan ka surok Jowai Bypass kaba haka shnong Mihmyntdu kaba jngai khyndiat kilometre na Jowai. Katba u Fullmoon Kharsahnoh uba niah kali Jowai Shillong ula jah ryngkat bad ka kali haka 16 tarik Nailar bad ïaka met jong u la lap ha Mynkre ka lynti ban leit sha Amrit Cement, East Jaintia Hills haka juh hi ka sngi kata 16 tarik.

Ïaka kynhun jong u I Love You dei ban rat dyngkhong naduh tyllong namar ki pynsmiej pynsyier ïaka leit ka wan jong ki briew haka imlang sahlang kumta dei tang ban set phatok shi jingim ne sdien phasi ïaki, la ong utei u kñi jong u (L) Fullmoon Kharsahnoh u Bah P Kharsahnoh.

“Hadien ka jingjia shah pynïap ki arngut ki mynsiem ba lui lui, nga sngewsyier ban leit jingleit, lada nga mih na shnong ban leit sha Shillong wat ba ngan kiew kali na Ummulong ruh nga lah sngewtieng”, la ong shuh shuh utei u kñi.

Ula bynrap ba lehse kan don ka por ba kane ka kynhun kan ïoh jamin (bail) bad lada don uno uno ne kano kano u/ka briew kiba bah jamin ïaki, la ka long ka kmie, u kpa, ka lok, u kñi, u pyrsa maki ruh ki don bynta lang haka jingpynïap briew ne wat u/ka muktiar kiba ïasaid sakhi lamler ïaki, maki ruh ki hap ha u pud jong ka jingpynïap briew.

U ma Mingstone Rymbai ba haïing hasem jong u (L) Damehipaia Papeng ula kyrpad ïaki bor jong ka aiñ ban sdien phasi shirta jingim ïa baroh kiba donkti ban pynïap dusmon ïa u pyrsa jong u u (L) Damehi Papeng.

Kane ka jingïalang da kawei ka sur ka la rai ban dawa ïaka jingsdien phasi ne jingset phatok shirta jingim ïa kitei ki riew thrang snam.