Sha Delhi la pynkynriah ia u Deputy CM ban ioh ia ka jingsumar ba kham biang

Syllad | The Rising MeghalayaSeptember 11, 2024

U Symbud Myntri Rangbah ka Jylla u Bah Prestone Tynsong uba don hapdeng ka jingshitom haka 11 tarik Nailur la pynkynriah noh sha ka nongbah Delhi na ka bynta ban ioh shuh shuh ia ka jingsumar kaba kham biang.

“La pynkynriah noh ia u Deputy CM sha Delhi na ka bynta ban ioh shuh shuh ia ka jingsumar kaba kham paka,” pyntip u Commissioner & Secretary ka sorkar Jylla u Vijay Mantri.

Kane ka jingpynkynriah ia u Bah Prestone ka la wan long ruh hadien ba u la don hapdeng ka jingshah sumar hapoh Nazareth Hospital, Shillong namar ka jingkem pang kynsan ha ka 9 tarik mynta u bnai naka jingshitom lang snam hajan jabieng (Subdural Hemorrhage). u Bah Prestone u don hapoh ICU hapoh ka jingkhmih bniah jong ki doktor hashwa ban pynkynriah noh ia u.

Ha kawei pat ka bynta ka National People’s Youth Front (NPYF) ka ai ka jingkitbok ia une u State President ka NPP uba dei ruh u Symbud Myntri Rangbah ka Jylla u Bah Prestone Tynsong ba un ioh noh ia ka jingkoit jingkhiah.

U President ka NPYF u la ong, “U Bah Prestone ula kham iohbor hadien ba ula ioh ia ka jingsumar bad ki Nongialam ka NPP baroh ki kitbok ba un ioh noh ia ka jingkoit jingkhiah kaba pura.”