Sha High Court byrngem mudui ka Congress lada ym hun ia ka rai u Lamphang halor ki MLA phet Seng

Syllad | The Rising MeghalayaSeptember 21, 2024

Ka Liang pyrshah Congress ha ka 20 tarik Nailur ka la byrthen ban ujor sha ka iingbishar High Court lada kam hun ia ka rai u Lamphang ka Iingdorbar thaw ain halor ka jingmudui pyrshah ia ka jingleit pyniasoh jong ki laingut ki MLA ka Congress sha ka Seng National People’s Party (NPP).

Na ka liang ka Congress ka la buh ia ki artylli ki jingmudui, kata kawei ia ki arngut ki MLA ba la sospon kiba kynthup ia u Bah Charles Marngar (MLA ka Mawhati) bad u Bah Gabriel Wahlang (MLA ka Nongstoin) bad kawei pat pyrshah ia u Dr Celestine Lyngdoh (MLA ka Umsning) hadien ba kila leit ban pyniasoh ia lade sha ka NPP ha ka 19 tarik Nailar ba la dep.

Na ka liang u nongialam ka Congress uba dei ruh u MP barim ka Shillong u Bah Vincent H Pala u la pynpaw sha ki lad pathai khubor da kaba ong, “Ka mat ba kongsan jong ka jingmudi hi ka long ba ngi ieng beit ha ka para 21 (a) jong ka 10th Schedule jong ka Riti Synshar Ri.”

“Ngi la mudui ha ka iingkashari jong u Lamphang. Ynda u Lamphang u la pynkut noh ia ka mukotduma bad ai ia ka rai lane kano kano ka jingpynshai, bad lada ngim sngew hun ia kata, ngin leit ban kyrpad ia ka iingbishar, kata sha ka High Court. Hynrei lada ngim hun sa ia ka rai jong ka High Court ngin leit sha ka Supreme Court. Kane kam dei ka kam kaba malu mala, kan leit sha ki iingbishar ba halor,” ong u Bah Pala haba bynrap ba ka Congress mynta ka dang ap ia ka hukum ba pynmih da u Lamphang.

Katba naka liang u Joint Secretary ka AICC uba khmih ia ka Meghalaya u Mathew Anthony u la buh jingkylli halor ka rai jong u Lamphang ka Iingdorbar thaw ain na ka bynta ban iasyllok ba u Advocate General hashwa ban ai ia ka rai ka jong u ha kaba iadei bad kane ka phang.

“Lada u Lamphang u la sngew thikna halor ka rai ka jong u, balei ba u Lamphang u la phah biang sha u AG.Lada u la sngew thikna halor ka rai ka jong u balei u donkam ia ka jingpan jingmut na ki riew said ain, kane ka pyni ia ka jingtlot ne ka jingartatien ne jingtieng ia ka jingbym lah jong u Lamphang ba lada kan leit sha ka jingujor, u lah ban ngat ha ka jinglong jingman ka bym iahap namar ka rai kyrkieh ka jong u.Jin da la u Lamphang u la pan jingmut na u AG ha ka por ka jingkyrpad ban pyniasoh ka la wan shwa ban shim ia ka rai ba u la mynjur ia ka jingpyniasoh, kumta ruh mano ba bakla hangne? ai ba ka ain kan rai,” u la ong.