Sha ka CBI aiti ia ka jingtohkit halor ka jingjia ha Mukroh, pynkut ia ka Judicial Commission

Syllad | The Rising MeghalayaSeptember 30, 2023

Ka jingialang hapdeng ki Myntri Rangbah ka Assam bad Meghalaya kaba la long ha ka sngi Saitjain hapoh Khanapara, Guwahati ban iakren halor ka kam ia pynbeit na ka bynta ki hynriew tylli ki jaka kiba dang sahteng ha ka wat kaba ar ka la shim ia ka rai ban pynkut noh ia ka jingtohkit lyngba ka judicial enquiry commission ia kaba la thung da kine ki ar jylla ha kaba iadei bad ka jingjia shah siat iap ha ka shnong Mukroh kaba la jia ha ka snem ba la dep bad ban aiti noh ia kane ka jingtohkit sha ka tnat Central Bureau of Investigation (CBI).

U CM ka Assam u Himanta Biswa Sarma haba kren sha ki lad pathai khubor hadien kane ka jingialang u la ba kam shym la don satia ka jingiatreilang hapdeng ki ophisar na jylla Assam bad Meghalaya bad ki commisson ba l thung jong kine ki ar jylla, bad kumta ban ym ban khia ia ki ophisar na kine ki ar jylla ki la rai ban aiti noh ia kane ka jingtohkit sha ka CBI.

Nalor kata u la ong ba ki la shim ruh ia ka rai ban weng noh ia ki bor pahara na ki jaka khappud kiba don hapdeng ka jingiakynad bad ban phah noh da ki pulit CRPF.

U la ong ruh ba ki la shim ia ka rai ban ia pynbeit shwa ha kaba iadei bad ki laitylli napdeng ki hynriew tylli ki jaka kiba don ha ka jingiakynad kiba kynthup ia ka Langpih bad kyntu ruh ia ki regional committee ba kin kham pynkloi ha kaba iadei bad kane ka phang.

Shuh shuh halor ka jingdonkam jong ki paid Khasi Pnar ban leit ot ia u kba nalor kiwei pat ki mar rep sha ki pynthor kiba don sha ki jaka rep ka jingialang ka la shim ia ka rai ban bthah ia ki DC ba kin khmih halor kane ka bynta bad lada jia ba mih biang kano kano ka jingiakajia ki regional committee jong ki ar jylla kin hap ban leit sha katei ka jaka ban bishar bniah ia ka jinglong jingman.