Sha ka ECI yn kyrpad ka VPP ban peitngor bha ia ka Rilum Jaintia shwa ka elekshon Assembly 2028

Syllad | The Rising MeghalayaApril 17, 2025

Ka Liang Pyrshah Voice of the People Party (VPP) ha ka 16 tarik Iaiong ka la pynbna ia ka rai ban leit iakynduh shen ia ki heh ka Election Commission of India (ECI) ban kyrpad ba kan peitngor bha ha Rilum Jaintia khnang ban pynthikna ba ka jingpynlong ia ka elekshon sha ka iingdorbar thaw ain ha u 2028 kan long kaba iaid beit iaid ryntih.

Haba kren ha ka jingialang paidbah ha Iawthymme, Jowai, u khliehduh ka VPP uba dei ruh u MLA ka Nongkrem u Bah Ardent Miller Basaiawmoit u la ong, “Shen ngin leit iakynduh ia ki heh ka ECI ban pyntip ba ki don ki district ha Meghalaya ha kaba ki briew kim ioh ban pyndep laitluid ia ki hok thep vote jong ki khnang ba ka ECI ka ban pynlong ia ka elekshon ha u 2028 kan peitngor bha hapoh Rilum Jaintia.

“Ngin iakhun bad ngin ym ailad ba ki hok thep vote jong ki paidbah kin shah knieh noh. Ngin pynthikna ba ki (kiba don ha ka bor) kin ym lah ban leh kumba ki la leh ha kane ka elekshon ba la dep sha ka JHADC,” u la bynrap.

Ka VPP dang shen ka la aiti ia ka dorkhas sha u Chief Secretary ka Jylla u Bah DP Wahlang ban dawa pynlong da ka jingtohkit kaba laitluid halor ka jingkynnoh ba ka Sorkar ka la pulom ban pynlong ia ka elekshon kaba laitluid bad kaba khuid ba suba sha ka JHADC ha u bnai Rymphang ba la dep.

“Ngi la phah ia ki jingujor sha u Chief Secretary, ngi la rah ia kane ka mat hapoh ka iingdorbar ka Jylla,” ong u Bah Ardent.

Lah ban kdew ba ka VPP ka la jop tang 8 na ki 29 tylli ki seat ha kane ka elekshon ba la dep ha JHADC.

U president ka VPP u la kynnoh ruh ba ka party synshar ka la pyndonkam bakla ia ka bor jong ka lyngba ki tnad treikam tynrai bad ki Rangbah Shnong hapoh Rilum Jaintia.

“Nga la iai ban ba lada ka jingpynlong ia ka elekshon ka la long kaba khuid ba suba, ka VPP kan jin da la ioh ban ialam ia ka EC hapoh JHADC. Ngi kren ia ka jingshisha. Kam dei namar ba ngi rem, hynrei ngi kren ia ki mat, ngi kren namar ngi tip ba ka la don ka jingpyndonkam da ka bor dohksah. Ngi kwah ban pynduh jait ia kane ka rukom pyndonkam da ka bor dohksah ha ka por elekshon. Kane ka jingialang ka dei ka jingsdang jong ka jingiaid lynti jong ngi ban pyllaitluid ia ki paidbah ka Rilum Jaintia na kiba kum kine ki jingshah pyndonkam bakla ia ka bor ha ka por elekshon bad ban thep ia ki vote da ka jinglaitluid,” pynbna u Bah Ardent.

Nalor kata u la ong ruh ba ka VPP kam kwah ia kano kano ka vote sngewsynei na ki paidbah. “Ngi kwah ba ki briew kin thep ia ki vote jong ki katkum ki rai kiba la tip bha namar ngim shaniah ha ki vote sngewsynei,” u la pynpaw.