Sha ka Lokayukta phah tohkit ka HYC halor ka jingthied ka Tnat Housing da ki tin sop iing ba tad dor

Syllad | The Rising MeghalayaJune 26, 2024

Ka Seng Hynniewtrep Youth Council (HYC) ha ka 25 tarik Jylliew ka la ujor da ka mukotduma pyrshah ia ka Directorate ka tnat Housing sha ka Meghalaya Lokayukta ba kan tohkit halor ka jingkynnoh suba  pyndonkam bakla ia ka pisa paidbah lyngba ka jingthied da ki tin sop iing ba tad dor bad stang ba la sam sha ki paidbah lyngba ki Community & Rural Development (C&RD) Block ha ka jinglut kaba ym duna ia ka T.20 klur.

Ka HYC ka la kyntu ruh ia ka Lokayukta ba kan hukum ban pynkut noh mardor ia baroh ki order kiba iadei bad ka jingpynioh ia kine ki tin sop iing lyngba ka kompeni Hariana Iron Works Pvt Ltd na Kolkata, West Bengal sha ki C&RD Block ha ka Jylla bad ban pynsangeh ban sam bad pynphai shisyndon ia kine ki tin.

Kane ka jingujor jong ka seng ka la wan long ruh shi sngi hadien ba u Myntri ka Tnat Housing u la pynbna ba la thung da ka Departmental Enquiry na ka bynta ban pynlong ka jingtohkit halor kane ka jingkynnoh sam da ki tin sop iing kiba tad dor. Na ka liang u Myntri u la kam ruh ba ka jingthied ia kine ki tin da ka Tnat ka dei kaba la iaid katkum ki kyndon.

Haba kren sha ki lad pathai khubor hadien ba la dep aiti ia ka jingujor, u president ka HYC u Bah Roy Kupar Synrem u la ong ba ia kane ka jingujor la leh katkum ka kyndon 20 jong ka Meghalaya Lokayukta Act, 2014. U la ong ruh ba kane ka sienjam ba la shim da ka Seng ka long hadien ba ka la ioh ia ki jingtip bad kiba bun ki jingujor ha kaba iadei bad kine ki tin sop iing ki bym bha bad kiba stang ia kiba la sam sha ki C&RD Block ha kylleng ka jylla Meghalaya khamtam hapoh Rilum Khasi bad Jaintia.

Na ka liang u Bah Synrem u la ong ruh ba ka jingpynbna jong u Myntri ban pynlong ia ka jingtohkit ka ban khlieh da u Joint Secretary ka dei tang ka jingpyndep rukom ka ban ym poi shano shano ruh.

U la ong ruh ba ka Seng ka la ujor sha ka Meghalaya Lokayukta namar ka jingbym hun satia ia ka jubab jong u Myntri ka Tnat Housing ha kaba iadei bad kane ka jingdawa tohkit jng ka Seng ha kaba iadei bad kane ka jingthied da ki tin sop iing kiba tad dor khnang ba kito ki ophisar bad kiwei pat kiba donkti kin ngat ha ka jingshah pynshitom.

“Katkum ka kyndon la kdew shai ba kine ki tin sop iing ki dei ban don ia ka jingrben kaba long 0.45 MM, hynrei hadien ba la tohkit bniah la shem ba ka jingrben jong kine ki tin ka long tang 0.25MM haduh 0.28 MM, kata kaba long hapoh ia ka standard ba la buh,” ong u president ka HYC.

Shuh shuh u la ong ruh ba kane kam dei tang ka jingpyndonkam bakla ia ki projek kam pynroi sha ki thain nongkyndong, hynrei ka buh ruh ka jingma na ka bynta ka jingshngain jong ki nongioh jingmyntoi lyngba kine ki mar kiba tad dor.