Sha ka NGT byrthen ka KSU ban ujor, ba iap biang ki dohkha bad kylla rong Lukha

Syllad | The Rising MeghalayaApril 25, 2020

Ka Khasi Students’ Union (KSU) Narpuh Circle ka la rai ban iaid shakhmat ban ujor sha ka National Green Tribunal (NGT) halor ka jingkylla rong blue ka wah Lukha bad iap pathar ki dohkha da ki hajar tylli.

Ki paidbah ba shong harud wah ki la ia tuid sha wah Lukha ban lum dohkha ba iap haka sngi Palei.

Kane ka jingkylla rongblue ka wah Lukha kala pynsngewsih ïaka KSU bad ki paidbah ba shong harud wah Lukha namar tang shi taiew hadien ba la pynmih khubor jingkmen ka KSU Sonapyrdi Unit halor ka jingsdang jyrngam biang ka wah Lukha bad ka jingsdang ban don dohkha biang ha kane ka wah, hynrei kynsan kynsan kane ka wah ka la kylla rong bad la pyniap ia baroh ki dohkha. 

Lah ban pynkynmaw ba ka jingkylla rongsuiñ bneng (blue) kane ka wah ka la jia naduh u bnai  Rymphang 2007, bad naduh utei u snem ka iai bteng ka jingkylla rong haduh mynta.

Ka KSU ka la pyrshang ban wad da bun ki lad ban ujor sha ki bor synshar district, MSPCB, Ministry of Environment & Forest wat shaduh u Dr. DD Lapang ha ka por ba u dangbat kum u Myntri Rangbah ka sorkar jylla bad kumjuh sha u Bah Prestone Tynsong ha ka por ba u dangbat kum u Myntri ba peit ia ka tnat Forest.

Ha u snem 2012 ka seng ka la dawa na ki bor synshar district EJH ban dawa da ka jingtohkit ba laitluid (Independent Inquiry), hynrei kam shym la leh satia.

Katkum ki dak ki shin ba paw imat ka sorkar jylla kam kwah satia ban iada ia kane ka wah. Kumta ym donkam shuh ban pynlut por ban ujor sha kitei ki tnat sorkar, ka KSU ka la rai syndon ban ujor sha ka NGT, la pynpaw ka KSU lyngba u kyrwoh ba la phah da u Sanatomba Bamon, General Secretary KSU Narpuh Circle.