Sha ka NGT phah ujor u CM ka Assam ba shlei um ka sor Guwahati na ka jingtih lum ha Meghalaya

Syllad | The Rising MeghalayaAugust 14, 2024

U Myntri Rangbah ka Assam u Himanta Biswa Sarma ha ka 13 tarik Nailar, u la kyntu ia ki nongshong shnong ka sor Guwahati kiba la shah ktah na ka jingshlei um ba kin leit ujor sha ka National Green Tribunal (NGT) pyrshah ia ka jingtih lum thurmur khlem ka jingstad saian ha Jorabat hapoh Meghalaya.

“Nga la iai pynpaw ba ka jingtih bad ka jingmait ia u lum ha ka rukom kaba thurmur (unscientific) ha Jorabat ka la wanrah ka jingshlei um ha sor Guwahati. Kito kiba kynthoh ia nga, ki dei ban kynmaw ba kane ka jinglang um ka kham jur ha ki bynta jong ka Dispur Circle, balei ym ha Uzan Bazaar bad balei ym ha Paltan Bazaar bad Pan Bazaar. Balei ka don ka jingshlei um tang ha ki bynta jong ka Dispur kaba markhap ka Jorabat,” ong u Sarma sha ki lad pathai khubor shabar jong ka prokram.

“Nga kyntu ia baroh ki nongshong shnong kiba shah ktah ha kane ka jingshlei bad lang um ba kin leit ujor sha ka NGT khnang ba ngin lah ban pynsangeh ia kane ka jingtih bad mait lum pathar ha Meghalaya. Kane kan iarap ia ngi ba ngin lah ban weng pat ia kane ka jingeh,” ong u Sarma.

U Myntri Rangbah ka Assam u la kam ba ka sorkar jylla ka la thung ia ka kynhun ki riewshemphang ban pule bniah kumno ban pyntuid ïa ka um kaba la lang na Basistha sha ka Deepor Beel lyngba ka Mora Bharalu bad Juripar bad Rukmini Gaon sha Shilsako Beel, namar ba ka wah Bahini kam lah ban kit bun palat ka um.

“Hynrei kane kan shim por kumba lai snem, namar ki mat bapher bapher kum ka jingshim jaka ban shna ïa ki nala um. Ka jingiatreilang jong ki briew ruh ka long kaba donkam. Ngi hap ban siew ia ki na ka bynta ka jingshim jaka. Ki lai snem ban wan kin long kiba eh ïa ngi,” u la bynrap.

Kane ka jingkyrpad jong u Sarma ia ki paidbah ka la wan shisngi hadien ba u la ong ba ka sorkar jong u kan leit ujor sha ka NGT pyrshah ia ka skulbah shimet ka USTM, kaba u la kam ba ka la tih bad pom ia u lum ha ka jaka pule jong ka kaba la wanrah ka jingshlei um kaba jur hapoh sor Guwahati. .

Kane ka skulbah ka don ha ka thaiñ 9th Mile Ri-Bhoi District ka Meghalaya hajan Jorabat, kata ha khappud hapdeng kin ki ar jylla bad kaba long kum ka jaka rung sha ka nongbah Guwahati.