Sha ka T.1,50,000 klur kyntu u CM ia ka Sorkar Pdeng ban kyntiew ia ka skhim SASCI

Syllad | The Rising MeghalayaDecember 22, 2024

U Myntri Rangbah ka Jylla u Conrad K Sangma ha ka 20 tarik Nohprah u la iai ban jur halor ka jingdonkam ban bteng ban pynkhlain bad kyntiew shuh shuh ia ka skhim Special Assistance to States for Capital Investment (SASCI) da kaba kyrpad ban kyntiew ia kane ka skhim sha ka jingmang kaba T.1,50,000 klur na ka bynta u snem mang tyngka u ban wan.

U CM u la pynpaw ia kane hakhmat ka Myntri Pla Tyngka ka Sorkar Pdeng ka Nirmala Sitharaman ha ka Pre-Budget Consultation kaba la long ha Jaisalmer, Rajasthan ha kaba u la ong ruh ba ka skhim SASCI ka long kaba iarap shibun ia ki Jylla khamtam ki jylla ha ka thain Shatei Lammihngi (North East) ba kin pyntreikam ia ki project kiba kongsan kiba kyntiew ia ka roi ka par bad ia ka bha ka miat jong ki nongshong shnong.

Da kaba ithuh ia ki jingeh ba kyrpang kiba ki jylla ka thain Shatei Lammihngi ki iakynduh, u CM u la pynpaw ba dei ban bhah kyrpang T.10,000 klur hapoh jong ka skhim SASCI tang na ka bynta ki hynniew tylli ki jylla jong ka thain North East lait noh ka Assam. Nalor kata u la pynpaw ruh ba ki jinglong jingman ki jaka ha ka thain ki lam sha ka jingkiew dor jong ki tiar ki tar bad ki mar ki mata kiba iadei bad ki jingtei kaba long hapdeng ka 35% haduh 50%, kata palat ban ia kiwei ki thain bad kiba ktah jur ia ki sienjam ba la shim ha kaba iadei bad ki kam pynroi.

Ban weng ia ki jingeh kiba iadei bad ki jingpynroi ia ki jingshakri lyngba ka digital ha Meghalaya, u Conrad u la tyrwa ban thaw ia 1000 tylli ki Citizen Digital Service Delivery Centers (CDSDCs) ha kylleng ka Jylla Meghalaya khnang ba kine ki centre kin pynbiang ia ki lad jingshakri sha ki paidbah na ki tnad sorkar bapher bapher, kata kum ki prokram kiba iadei bad ka bha ka miat ha ka imlang ka sahlang, ki jingshakri lyngba ki bank, ha ka koit ka khiah bad ka pule puthi khamtam ha ki thain nongkyndong kiba pajih bad kiba ka jingnang jingtip halor ka Digital Literacy ka dang duna shibun.

“Nalor ka jingai jingkyrshan bad ka jingkiew ha ka jingdon jong ki Village Organizations (VOs) ha Meghalaya, kiba bun ki dkhot jong ki kynhun Self Help Group ba pyniaid da ki kynthei ki dang pyrshang ban pynheh ia ki kam khaii pateng ki jong ki. Ban pynbang ia ka jaka kaba shngain ha ki jingtreikam jong ki ban kyntiew ia ki sap ki phong, ngi la tyrwa ban pynheh ia ka skhim SASCI ban ioh pdaing ia ki jingkyrshan pisa na ka bynta ban tei ia ki 1000 tylli ki VO Service Delivery Center ha kylleng ka Jylla. Ngi la kyntu ruh ia ka Tnad Pla Tyngka ban pdiang ia kane ka jingtyrwa ban kynthup lang ha ka jingbei tyngka lyngba ka skhim SASCI,” ong u CM ka Jylla.

Ban pynthikna ba ka jingshakri lyngba ki bank kan poi sha ki thain nongkyndong ka jylla, u CM u la kyntu ia kane ka Tnad pla tyngka ban pynshlur ia ki bank ba kin pynkhlain ia ka jingdon ki tnad treikam jong ki kumjuh ia ki nongtrei khnang ba kin lah ban ai ka jingshakri kaba kham bha sha ki paidbah.

Ka jingpyndap ia ki jingduna ki skhim kiba iadei bad ki jingtei kum ka AMRUT bad ka AMRUT 2.0 kiba thmu ban pynbiang ia ki jingtei ba kongsan ha ki jaka sor, ki la treikam tang khyndiat eh ha ki jylla kum ha Meghalaya. Halor kane u CM u la pynpaw ba watla la weng noh ia ki kyndon jingbun briew kaba 1 lak ngut, hynrei ka jingmang pisa jong ka AMRUT 2.0 ia ka thain North East ka dang duna, kata tang 2.68% na baroh ka pisa kaba kot haduh T.66,750 klur kaba la hiar sha ka 1.52% khlem da khein ia ka Assam.

Khnang ban weng ia kine ki jingduna na ka liang ka Jylla ka la kyrpad ban kyntiew ia ka jingmang tyngka jong ka AMRUT ha kane ka mangtyngka mynta u snem bad ruh ban wanrah ia ka mangtyngka kaba kyrpad na ka byna ka thain North East bad ia ki sor kiba don ha ki thain jaka lum khnang ban shimkhia ia ki jingeh kiba iadei bad ki jingtei bapher bapher bad ban pynbiang ia ki jingdonkam ha ki kam pynroi ha ki jaka sor.

Na ka liang u CM u la tyrwa ruh ia ka jingpynlut kaba mar 50-50 ha ka jingpyntreikam bad jingpynlut na ka bynta ki jingmaramot bad pynbiang bad sumar ha ka jingpyntreikam ia ka Jal Jeevan Mission na ka bynta ki 2-3 snem kiba nyngkong da kaba ithuh halor ki jingeh kaba ka jylla ka mad ha ka liang ka ioh ka kot bad halor ka jinglong jingman jong ki jaka puta. Lyngba kane ka jingiatreilang yn lah ban iarap ia ki jylla ban lah ban pyntreikam ia kane ka mishon ba kan long kaba seisoh bad kaba neh.

Ka jingpyndonkam ia ka jingthmu jong ka Lakhpati Didi, ka Meghalaya ka thmu ban kyntiew ia ka jingtreikam ki micro enterprises ba pyniaid da ki kynthei bad ban pyniar ia ki lad kamai jong ki.

Ban pynurlong ia kane, ka Jylla ka tyrwa ban pynkiew ia ka ram na ka T.3 lak sha ka T. 5 lak ban kyrshan ia ka jingpynheh ia ki kam ba la don lypa ba la pyniaid da ki dkhot jong ka Self-Help Group (SHG). Nalor kata, ka Meghalaya ka ai jingmut ban pynrung shuh shuh ïa ka jingai sut kaba 3% halor ka jingsiew kloi ïa ki ram ban pynshlur ïa ki SHG ban shim ram, kaba ïahap bad ka rukom treikam jong ka Kisan Credit Card (KCC) .

Kumta ruh na ka liang u CM u la pynpaw ba da ka jinglah ban khmih bniah halor kine ki bynta kiba kongsan bad ka jingbteng ia ka jingkyrshan lyngba ka skhim SASCI ia ki jylla ka thain shatei lam mihngi, ban buh ia ki Digital Service Center, ban kyrshan ia ki Village Organization, ban pynheh ia ka bhah tyngka bad pynkhlain ha kaba iadei bad ka Digital Literacy, kumta ruh ka Myntri ka Sorkar Pdeng kaba khmih ia ka Pla Tyngka ka don ia ka bynta kaba khraw na ka bynta ban kyntiew ia ka roi ka par bad ka imlang sahlang ha ka jylla Meghalaya.