Sha ka Vadodara Cricket Academy phah pyntbit ka MCA ïaki khynnah ialehkai U-19

Syllad | The Rising MeghalayaSeptember 15, 2021

Kum shi bynta ban pyntbit bad ban pynkhlain ia la ka jong ka kynhun ialehkai, ki bor pyniaid ka Meghalaya Cricket Association (MCA), ki la shim sa ia kawei pat ka sien jam bad katta ka long ka jingphah ban ia kilan ia la ka jong ka kynhun ialehkai U-19 Cricket sha ka shlem ai jinghikai jong ka Vadodara Cricket Academy.

Kane ka jingioh lad ka MCA ba kan phah ia la ki jong ki khynnah ban ia kilan sha kane ka shlem ai jinghikai ka la wan lyngba ka jingiakren bad ki bor ba dei khmih jong ka Baroda (vadodara) Cricket Association, ba don ha jylla Gujarat.

Haba iadei bad kane, u Hony. Secretary ka MCA u bah Gideon Kharkongor, ryngkat u vice president u bah Dipul Ryntathiang, ki la ioh ia ka lad ba kin ia shem ne ban ia kynduh ia u CEO ka BCA u Shishir Hattangadi bad kumjuh ia u Director ka VCA U Harendra Patel, kane ka jingiakynduh ka long ban iakren bad ban ia pyunbeit naka bynta ban thaw ia ki lad ki lynti da kumno ban lah ha kaban kyntiew ia ka jingialehkai ia ka cricket hapoh ka jylla Meghalaya.

Ka daw bah ba pynlong ia ka MCA ba kan hap ba kan wad ia ki lad ki lynti kiba kum kine ban phah kilan ia la ki jong ki khynnah ialehkai shabar jong ka jylla ka dei tang namar ba ka jinglong jingman jong ka suin bneng ha Meghalaya ka long ba ki nongialehkai ki ioh tang kumba lai bnai ban ioh ban ia kilan ne ban ialehkai pura ia ka cricket, kaba lait nangne, ka jinglong jingman ka suinbneng ka long u slap uba jur u khanglad ban ioh ban ialehkai pura ia ka cricket ha la iing.

Khyndiat shaphang ka vadodara, ka dei kawei na ki pneh jong ka kam kyntiew ia ka cricket ha India, kaba na ka liang ka jong ka, ka don ruh ia baroh ki jait jingdonkam kiba ka lah ba kan ai ne sam lem sha kiba bun ki khun samla kiba sliang ne thrang ban long kum ki nongialehkai kiba kynsai ha ka ri.

Tang kum ka nuksa ba ha kane ka kynti hiar ia kilan ka kynhun ba mynta ka MCA, ki khynnah ialehkai ka Meghalaya ki ioh lut ia ka lad ban ialehkai kylluid ha ki madan ba kyrpang, nangta ki don sa ki jaka ban lah ban ai ia ka rukom ia kilan met ne gym kiba pura ia ki khynnah, nangta ki pung jngi bad kaba kham kongsan tam eh napdeng kine, dei ka jingioh lad ban iakhun pyrshah ia ki khynnah ialehkai ba dei na kiwei pat ki kynhun jong ki shlem ialehkai kriket ba dei jong ki synjuk ialehkai ba don ha ka ri.

Kane ka shlem ai jinghikai ka la dep ba kan sei na ka shlem ka jong ka ia ki rang ialehkai ba la paw bha ha ka ri kum u Munaf Patel bad ki arngut shipara ki Yusuf Pathan bad Irfan Pathan.

Ka jingphah ia kilan ka MCA kam shym la shu kut tang ha kane ka kynhun, pynban, kham ha shwa jong kane, ka kynhun ki thei ialehkai U-19 mynta ki don hapoh ka shlem ai jinghikai jong ka Just Cricket Academy ha Banglaore, katba ka kynhun ialehkai U-25 ki khynnah shynrang ki don mynta ha ka shlem ai jinghikai ha VCA, Vizag bad ka kynhun ualehkai jong ki senior ki don ha Pondicherry.