Sha Marten hap leit bret ïaki ñiut ba mih na sor Jowai.

Syllad | The Rising MeghalayaJuly 1, 2021

Ka Jowai Municipal Board (JMB) kum shibynta ban pynjem iaka jingeh u paid nongshong shnong ka Jowai kala hap ban leit bret iaki ñiut ki nier kiba mih na ki iew ki hat bad ki ïing ki sem jong ki briew na sor Jowai sha Marten, Mawiong, Shillong.

Kane ka jingleit bret ñiut ka Jowai Municipal Board sha Shillong ka dei hadien bala mih ka jingpyrshah ka Khasi Students’ Union (KSU) Mupyut Unit, ka shnong Mupyut bad ki shnong ba marjan ban bret ñiut ha Mynkjai kaba dei ka jaka jong ka Jaintia Hills Autonomous District Council (JHADC).

Ka jingpyrshah jong ki paidbah ka long ba ka rukom bret ñiut ha Mynkjai kala long kaba la shu leh pathar bad torti ha kaba ki nongtrei ka JHADC bad ka JMB. La kynnoh ba hadien bala wan kit iaki ñiut na kylleng ka sor Jowai la shu lumthup iaki ñiut ha Mynkjai kaba la wanrah ka jingsma iwtung kaba shyrkhei kaba lah ban ktah iaka koit ka khiah ki nongshong shnong kumjuh ki jingri jingdup jong ki shnong kiba doh hajan bad katei ka jaka theh ñiut ha Mynkjai.

Naduh u ka 20 tarik u bnai Lber 2021 ka JMB kam shym la leit bret ñiut ha Mynkjai bad kala kit iaki ñiut na Jowai sha Marten, Mawiong.

Kaba lyngngoh pat ka JMB lane ka sorkar Jylla bad ka tnad Urban Affairs department haka jaka ban wad ki lad ki lynti ban ioh ia ka ka jaka ba paka mynta kala pynkylla iaka Riatmoolain, Ladthadlaboh kum ka jaka pynlang bad thep iaki ñiut ha ki trok kit ñiut.

Kane ka jaka ha Ladthadlaboh ka don harud surok Jowai Intermediary Road lane ka surok na wah Myntdu (Jingkieng Pamblah) sha Lad Nartiang, Jowai kaba la shu iehshrah mynta.

Ka JMB kala shna kyrpang bha ia kane ka jaka theh niut, ha kaba ka kali kit ñiut hadien ba kala wan lum iaki ñiut na kylleng ka sor Jowai kan theh pat ha kawei ka kali kaba ap ha katei ka surok. Kane ka jaka theh ñiut la shna tang da ki tin sopïing ban ioh pyntuid iaki ñiut na ka bynta ba haneng ka surok bad pynap iaka kawei pat ka kali shapoh.

La iathuh ba kane rukom pynlang bad thep ñiut ka JMB mynta kala sdang la shitaiew ar taiew ha katei ka jaka. La sakhi ruh ba ki paidbah kila theh ñiut la jan baroh shilynter kane ka surok.

Kane ka jingleh ka JMB bad ka bor shnong Ladthadlaboh ka buh jingma pat ia ki um ki wah namar hajan kane ka jaka ka don kawei ka wahduid kaba tuid sha Wah Myntdu.